Ish-anëtari i Ushtrisë Çlirimtare të Kosovës, Dritan Goxhaj është arrestuar në Tiranë, me urdhër të Gjykatës Speciale të Kosovës, me qëllim ekstradimi.

Lidhur me këtë ngjarje, ka reaguar edhe avokati i Dritan Goxhajt, Bashkim Nikolla, i cili ka thënë se Goxhaj dhe i ati i tij, Dilaver Goxhaj, kanë luftuar në shërbim të atdheut dhe janë dy luftëtarë për liri.

Ai ka thënë se pas kësaj ngjarjeje fshihen “duart e zgjatura” të Serbisë, që sipas tij, po kërkon të çojë ushtarakët e Kosovës në “gijotinën” e quajtur Gjykatë Speciale.

“Jam njoftuar nga familjarët e tij pasi isha në një gjyq penal dhe kam lënë gjyqin nga fundi për të shkuar drejt te banesa, ku ishte Dritani vetë, familja e tij. Kërkova shpjegime paraprake dhe mu tha se do i merrja në drejtorinë vendore të Policisë së Tiranës dhe do të firmosja mbi dokumentacionin përkatës. Në vendimin e gjykatës shënohet për efekt ekstradimi. Me këto informacione dhe personin që e njoh, luftën dhe punën në dobi të atdheut dhe të fjalës së lirë, pasi babë e bir janë dy ushtarë të UÇK-së. Në këtë përfundim dal, unë konstatoj këtu duart e zgjatura të Serbisë, për t’i çuar një nga një ushtarët e UÇK-së në gijotinën speciale të quajtur tribunal. Ekstradimi nuk është procedurë që bëhet menjëherë. Njerëzit nuk janë gurë, kanë të drejta dhe detyrime. E vërteta sado që të zhytet, nuk mbytet. Dritani është një luftëtar që ka duruar edhe makinerinë e plumbave serbe. Këta e ngritën për Hashim Thaçin stekën aq lartë dhe tan i kërkojnë një e nga një, për të shuar zërin e lirisë. Kjo është përtej një procedure penale. Ka prapavijën që unë e thashë”, është shprehur Nikolla për “News24”.

Kujtojmë se Dritan Goxhaj ka qenë shoqërues i trupave amerikane gjatë Luftës në Kosovë gjatë vitit 1999.

Ai i është bashkuar UÇK-së si oficer i ushtrisë shqiptare në shkollën e aviacionit dhe ka pasur autorizimin e Shtabit të Përgjithshëm të UÇK-së që të mbante kontakte me komandën e forcave amerikane në Shqipëri.

Gjykata Speciale arreston ish-luftëtarin e UÇK-së, Dritan Goxhajn