Policia e Kosovës ka arrestuar dy persona të dyshuar për disa raste të mashtrimit dhe ka sekuestruar një sasi të konsiderueshme parash, të cilat dyshohet se janë përfituar nëpërmjet këtyre veprave kriminale.

Personat e arrestuar janë një burrë 47-vjeçar dhe një grua 28-vjeçare, të dy shtetas të Kolumbisë. Sipas një deklarate të lëshuar nga Policia e Kosovës, të dyshuarit janë dërguar në mbajtje për 48 orë me vendim të prokurorit.

“Mashkull 47 vjeç, shtetas i Kolumbisë dhe femër 28 vjeç, shtetase e Kolumbisë. Me vendim të prokurorit, janë dërguar në qendrën e mbajtjes për 48 orë”, thuhet në njoftim.

Policia dyshon se këto mashtrime mund të jenë kryer në vazhdimësi edhe jashtë rajonit të Prishtinës. Gjithashtu, mendohet se numri i viktimave të mashtrimeve nga të dyshuarit mund të jetë më i madh se sa ai i raportuar deri tani.

“Personat e arrestuar dyshohet të kenë marrë nga ankuesit (punëtor të këmbimoreve) shuma të ndryshme parash duke i mashtruar (gjatë ri-numërimit kanë fshehur një shumë parash derisa kanë qenë duke i konvertuar).

Mbështetur në rezultate e para të hetimit, policia ka  ngritur dyshimin e bazuar se mashtrimet mund të kenë ndodhur në vazhdimësi edhe jashtë rajonit të Prishtinës, si dhe dyshohet se numri i personave të mashtruar nga personat e dyshuar mund të jetë më i madh se sa numri i raportuar.

Andaj, kërkojmë nga qytetarët që mund të kenë qenë viktimë e rasteve të tilla të lajmërohen në stacionin më të afërt policor, për të ndihmuar policinë drejt hetimit përfundimtar”, thuhet më tej në njoftim.