Bratislav Zhivkoviq, i njohur si komandanti i Lëvizjes Çetnike në Serbi, është arrestuar nën dyshimin për pjesëmarrje në luftë jashtë vendit, ka konfirmuar për “Radion Evropa e Lirë”, Ministria e Punëve të Brendshme e Serbisë.

Në përgjigjen e dhënë për “Radion Evropa e Lirë”, Ministria e Punëve të Brendshme e Serbisë, ka bërë me dije se me urdhër të Prokurorisë së Lartë Publike në Krushevc, është arrestuar Zhivkoviqi për shkak të dyshimit se ai ka kryer veprën penale të organizmit të pjesëmarrjes në luftë apo konflikt të armatosur në një vend të huaj.

I dyshuari është ndaluar 48 orë dhe më pas do të dërgohet në prokurorinë kompetente, bën të ditur kjo ministri.

Sipas Prokurorisë së Përgjithshme të Ukrainës, Zhivkoviqi dyshohet se ka marrë pjesë së bashku me gjashtë shtetas të tjerë serbë, në konfliktet në lindje të Ukrainës në anën pro-ruse.