Ukraina ka bërë me dije se ka arrestuar kreun e Gjykatës Supreme të shtetit, pasi dyshohet se është përfshirë në një rast të ryshfetit prej 2.7 milionë dollarësh.

“Kreu i Gjykatës Supreme është arrestuar”, ka thënë Oleksandr Omelchenko, prokuror në Zyrën e Prokurorisë kundër korrupsionit të Ukrainës.

Omelchenko ka thënë se dy persona, përfshirë shefin e gjykatës, Vsevolod Kniaziev, janë arrestuar si pjesë e hetimit, por refuzoi që të identifikojë personin e dytë.

“Ky është rasti më i madh ndonjëherë” që përfshin gjyqësorin, ka thënë kreu i Byrosë kombëtare kundër korrupsionit të Ukrainës, Seman Kryvonos.

Kryvonos ka thënë se një grup i gjyqtarëve brenda Gjykatës Supreme, që ishin pjesë e hetimit, cilësohen se i përkisnin një “grupi kriminal”.

Zyrtarët kundër korrupsionit thanë se miliarderi ukrainas Kostiantyn Zhevago u kishte dhënë ryshfet zyrtarëve gjyqësorë dhe një firmë ligjore kishte vepruar si ndërmjetësues.

Zyrtarët ukrainas kanë thënë se Zhevago kishte transferuar 2.7 milionë dollarë tek avokatët, prej të cilave 1.8 milion dollarë u ishin dhënë gjykatësve të Gjykatës Supreme dhe 900 mijë dollarë avokatëve për “shërbimet e tyre si ndërmjetësues”.

Ata kanë thënë se Zhevago kishte dashur që ta korruptonte gjykatën që ajo të merrte vendim që t’i lejohej të mbante kontrollin e aksioneve që kishte te një kompani minerare, pasi Zhevago kishte mosmarrëveshje me ish-hisedarët e kompanisë.

Zhevago, ish-deputet në Parlamentin ukrainas, aktualisht gjendet në Francë dhe Kievi po tenton që ta ekstradojë atë.

Në dhjetorin e vitit të kaluar, ai është arrestuar në Francë nën dyshimet për pastrim parash dhe keqpërdorim fondesh të lidhura me një biznes bankar në Ukrainë. /REL