Administrata Tatimore e Kosovës ka bërë me dije se bazuar në Ligjin Nr. 08/L-257 për Administrimin e Procedurave Tatimore, i cili ka hyrë në fuqi nga data 28 janar 2024, ka nxjerr udhëzuesin me të cilin plotëson/ndryshon procedurat për pajisje me vërtetim tatimor.

Qëllimi i këtij udhëzuesi është informimi i personave/tatimpaguesve për procedurat që duhet ndjekur për t’u pajisur me vërtetim tatimor, përgjegjësitë e zyrtarëve të Shërbimit dhe Edukimit të Tatimpaguesve në Drejtoritë Rajonale për të lëshuar vërtetimin tatimor, si dhe përgjegjësitë e zyrtarëve të Teknologjisë Informative në ATK për të mundësuar gjenerimin e vërtetimit tatimor.

“Pajisja me vërtetim tatimor mund të bëhet në mënyrë elektronike dhe në mënyrë manuale. Tatimpaguesi (biznesi) mund të pajiset me vërtetim tatimor online përmes Sistemit Elektronik EDI apo në zyrën përkatëse rajonale të Shërbimit dhe Edukimit të Tatimpaguesve. Ndërsa personi fizik jo-afarist (individi) mund të pajiset me vërtetim tatimor online përmes uebfaqes së ATK-së apo përmes linkut: https://evertetimi.atk-ks.org/ apo në cilëndo zyre rajonale më të afërt të Shërbimit dhe Edukimit të Tatimpaguesve”, ka njoftuar ATK-ja.

Vërtetimi tatimor për personin fizik afarist dhe personin juridik, lëshohet nga ATK-ja vetëm në rastet kur tatimpaguesi nuk ka ndonjë detyrim tatimor të pashlyer dhe në rastet kur tatimpaguesi ka obligime të pashlyera, mirëpo, është në marrëveshje për pagesë të atij borxhi me këste.

Ndërsa, vërtetimi tatimor për personin fizik jo afarist (individin), lëshohet nga ATK-ja vetëm në rastet kur personi nuk ka ndonjë detyrim tatimor të pashlyer, në rastet kur personi ka obligime të pashlyera, mirëpo është në marrëveshje për pagesë të atij borxhi me këste dhe në rastet kur ATK-ja nuk ka shënime për personin.

Ky udhëzues hyn në fuqi në datën e nënshkrimit, ndërsa fillon të zbatohet nga data 1 shkurt 2024 dhe i njëjti shfuqizon “Udhëzuesin lidhur me procedurat e pajisjes me Vërtetim Tatimor” të datës 18 shtator 2023.