Ministria e Infrastrukturës dhe Transportit sot në mbledhje ne qeverisë ka treguar se inaugurimi i autostradës Prishtinë-Shkup pritet të bëhet më 29 maj. Ndërsa, për përmbushjen e obligimeve të pagesave nga ministria, është bërë me dije se është duke u përgatitur një raport  i cili do të prezantohet para kabinetit qeveritar shumë shpejt.

Në mbledhjen e se martës Qeveria e Republikës së Kosovës ka miratuar udhëzimin administrativ për ndryshimin dhe plotësimin e udhëzimit administrativ për masat e veçanta për regjistrimin e pronës së paluajtshme të përbashkët në emër të dy bashkëshortëve.

Plotësim ndryshimet e udhëzimit  rregullojnë mundësinë stimuluese të regjistrimit të pronës në emër të dy bashkëshortëve  për të siguruar  pjesëmarrjen e barabartë të gruas dhe burrit në të drejtën e pronës së paluajtshme të përbashkët.

Kabineti qeveritar ka aprovuar nismat për lidhje të marrëveshjeve ndërkombëtare me Malin e Zi, Zvicrën dhe Francën për njohje reciproke të patentëshoferëve.

Miratimin e qeverisë e ka marrë edhe nisma për amendamentimin  e marrëveshjes për themelimin e programit kornizë për bashkëpunim financiar të Qeverisë së Republikës së Kosovës dhe Qeverisë së Hungarisë.

Me propozimin e Ministrisë së Infrastrukturës dhe Transportit është bërë emërimi i zëvendësdrejtorit të shërbimeve operative në Agjencinë e Navigimit Ajror të Kosovës, Valimir  Hylenaj për një mandat 5- vjeçar.

Kurse, Ministria e Zhvillimit Ekonomik ka njoftuar kabinetin qeveritar me gjendjen e vështirë financiare të Ndërmarrjes së Ujësjellësit në Mitrovicë, e cila po shkaktohet kryesisht nga mosrealizimi i inkasimit të të hyrave nga Mitrovica e Veriut.

/Epoka e re/