Aeroplani i Ukrainës që u rrëzua të mërkurën në Iran, me 176 njerëz në bord, ka bërë përpjekje të kthehej në aeroport, kanë thënë hetuesit iranianë.

“Boeingu 737-800” u rrëzua vetëm disa minuta pasi u nis nga aeroporti i Teheranit, duke mos lënë asnjë të mbijetuar.

Hetimet fillestare zbuluan se avioni ka pasur një problem derisa po dilte nga zona e aeroportit dhe se është përfshirë nga flakët. “Aeroplani, i cili fillimisht u nis drejt perëndimit, ndryshoi drejtimin për shkak të një problemi. Ai ka qenë duke u kthyer në aeroport në momentin kur është rrëzuar”, ka deklaruar shefi i Organizatës së Aviacionit Civil të Iranit, Ali Abedzadeh.

Irani ka deklaruar se nuk do ta dorëzojë kutinë e zezë – me të dhëna nga fluturimi – te “Boeing”-u apo Shtetet e Bashkuara.

Me rregullat globale të aviacionit, Irani ka të drejtë t`i udhëheqë hetimet, por kompanitë e prodhimit janë shpesh të përfshira.

Rrëzimi i aeroplanit ndodhi vetëm disa orë pasi Irani kreu sulme me raketa në dy baza amerikane në Irak.

Megjithatë, nuk ka prova se dy ngjarjet janë të lidhura.