Avokati tjetër i Hashim Thaçit, Lluka Mishetiq, ka thënë se Zyra e Prokurorit të Specializuar nuk ka paraqitur prova se klienti i tij u ka dhënë urdhra ushtarëve të UÇK-së për “kryerjen e krimeve”.

Mishetiqi ka thënë se ZPS-ja nuk ka asnjë provë se ka pasur linja të raportimit në mes të Thaçit dhe njësive të UÇK-së.

“Prokuroria nuk paraqet prova që Thaçi u ka dhënë urdhra ushtarëve të UÇK-së”, ka thënë ai.

Ai po ashtu ka thënë se gjatë Qeverisë së Përkohshme, Thaçi, pavarësisht se ishte kryeministër, ashtu siç u parapa me marrëveshjen në Rambuje, ai nuk kishte “pushtet ligjor dhe politik”, pasi ky pushtet ishte në duart të UNMIK-ut.

“Nuk kishte pushtet real dhe asnjëherë nuk kishte kontroll efektiv”, ka thënë Mishetiqi.

Më tutje, ai ka cituar një raport të grupit të krizës nga nëntori i vitit 1999, që sipas tij, dëshmon që Hashim Thaçi nuk ka qenë i kënaqur me krimet që po kryheshin pas luftës.

“Udhëheqësit e UÇK-së vazhdimisht u kanë bërë thirrje serbëve që të qëndrojnë në Kosovë”, ka thënë avokati mbrojtës.

Mbrojtja ka publikuar edhe një deklaratë të vjetër të Thaçit ku dëgjohet duke thënë se ata nuk kanë luftuar për ta spastruar Kosovën etnikisht dhe se ai beson që “popullata serbe nuk i ka kryer krimet ndaj shqiptarëve në Kosovë”. /REL