Avokatja e Jakup Krasniqit, Venkatesëari Alagendra, ka shprehur bindjen e saj dhe të ekipit mbrojtës se ish-zëdhënësi i UÇK-së, do të konfirmohet i pafajshëm në fund të procesit gjyqësor në Hagë.

Në një deklaratë për Nacionalen dhe media të tjera, avokatja e Krasniqit ka thënë se rruga e Krasniqit me drejtësinë ka qenë me shumë sfida.

“Ruga drejt drejtësisë për Z. Jakup Krasniqi ka qenë e gjatë dhe plot sfida. Duhet të dihet se kanë kaluar gati katër e gjysmë vjet që nga arrestimi i klientit tim, duke përfshirë një fazë para-gjykimi dhe dy vjet të plota që nga fillimi i gjyqit”, thuhet në fillim të reagimit.

Alagendra më tutje ka theksuar se komplet strategjia e mbrojtjes, ka qenë e bazuar në fakte, ligj dhe integritet.

“Gjatë gjithë kësaj periudhe, Mbrojtja ka mbetur e paluhatur në angazhimin e saj për të vërtetën dhe drejtësinë. Që nga fillimi i gjyqit, strategjia jonë ligjore ka qenë e mbështetur në fakte, ligj dhe integritet. Gjatë rastit të Prokurorisë, ne kemi mbrojtur dhe argumentuar vazhdimisht pozitat e paraqitura në deklaratën tonë të hapjes. Ato pozita mbeten të pandryshuara”, thuhet më tutje në reagimin e mbrojtjes së Jakup Krasniqit me rastin e përfundimit të çështjes së Prokurorisë.

Alagendra ka bërë të ditur se tash do të vazhdojnë me hapat e tjerë, për të siguruar që procesi të përfundojë sa më shpejt që është e mundur.

“Me afrimin e përfundimit formal të rastit të Prokurorisë në ditët në vijim, do të vazhdojmë me hapat e tjerë proceduralë, siç parashikohet në Rregulla. Ne jemi të angazhuar për t’u siguruar që këto hapa të përfundojnë pa vonesa, në mënyrë që të mund të jepet aktgjykimi përfundimtar sa më shpejt të jetë e mundur”, thuhet në reagimin e mbrojtjes së Jakup Krasniqit.

Reagimi përfundon me besim në drejtësi, e cila sipas avokates së Krasniqit, do të triumfojë, dhe ish-zëdhënësi i UÇK-së do të dalë i pafajshëm.

“Ne mbetemi të palëkundur në besimin tonë se drejtësia do të triumfojë – dhe se gjykimi përfundimtar do të konfirmojë pafajësinë e Z. Krasniqi”, përfundon reagimi i ekipit mbrojtës të Jakup Krasniqit.