Në sallën e Kuvendit Komunal të Mitrovicës, studentët përfitues të bursës komunale për vitin akademik 2018/2019, kanë nënshkruar kontratat të cilat ua ka dorëzuar kryetari i kësaj komune, Agim Bahtiri.

Me këtë rast, Bahtiri, i është drejtuar studentëve edhe me një fjalë rasti, duke thënë se ndjehet krenar si kryetar komune, sepse asnjë studenti që i plotëson kushtet, nuk i është mbyllur dera.

“Ju që keni përfituar bursa jeni studentë të dalluar, jeni ardhmëria e qytetit tonë dhe sigurisht përpos ngritjes profesionale, nesër edhe ndonjëri prej jush do të jetë në pozita udhëheqëse në komunë e më lartë. Ju inkurajoj që të mësoni e studioni për të ngritur diturinë tuaj që në të ardhmen të bëheni profesionistë të vërtetë”, ka thënë Bahtiri.

Pas nënshkrimit të kontratës, studentët janë shprehur të jenë të kënaqur me ndarjen e këtyre bursave. Disa nga ata janë shprehur të jenë mirënjohës për mbështetjen që komuna po iu ofron, si një motiv shtesë për të vazhduar studimet dhe një lehtësim financiar për familjet e tyre.

/Epoka e re/