Balla: Mbështetim krerët e UÇK-së
Kryetari i grupit parlamentar të Partisë Socialiste (PS), Taulant Balla, ka thënë se Shqipëria i mbështet liderët e UÇK-së, Hashim Thaçin, Kadri Veselin, Rexhep Selimin dhe Jakup Krasniqin të cilët janë duke u gjykuar në Hagë.
Ai ka thënë se pretendimet e Zyrës së Prokurorit të Specializuar në Hagë se ka pasur krime kundër njerëzimit janë të padrejta.
Duke iu përgjigjur deputetit demokrat Tritan Shehut, i cili ka përmendur Kosovën dhe mbështetjen që do duhej dhënë nga Shqipëria, Balla ka thënë se gjithçka është gati për të zhbërë raportin e Dick Martyt.
Ai është shprehur se firmat janë mbledhur nga më shumë se 5 vende dhe nga 20 anëtarë të Asamblesë Parlamentare të Këshillit të Evropës (KE).
“Lidhur me sa u kërkua nga deputeti Shehu në mënyrë të përsëritur unë besoj se Kuvendi e ka adresuar çështjen. Lidhur me pretendimet dhe shpifjet se gjoja gjatë luftës ka pasur krime kundër njerëzimit, këto janë të padrejta. Mbështesim krerët e UÇK. Dje Kosova ka miratuar vendimin që 14 prilli do të lidhet gjithmonë me të mbijetuarit e dhunës seksuale gjatë luftës në Kosovë dhe mendoj se kjo duhet të ishte ngritur si diskutim sot nga opozita. Mos bëni politikë me Kosovën. Firmat janë mbledhur tashmë, nga më shumë se 5 vende dhe numri minimal i anëtarëve të Asamblesë Parlamentare të KE-së që është 20. Ne po ecim përpara me rezolutën, po kur shkojmë nga Kosova tek paratë e fushatës është groteske (referuar fjalës së Shehut). Ju këshilloj të bëni dhe ju si ne, mbillni pemë”, ka thënë Balla.