Bandat shqiptare në Britaninë e Madhe po synojnë të rinjtë nga vendlindja e tyre për të punuar në operacionet e tyre kriminale.

Britania e Madhe është duke përjetuar një “valë të tretë” migrimi nga Shqipëria, me kriminelë që rekrutojnë “ushtarë” nga atdheu i tyre, ka paralajmëruar një pedagog.

Kontrabandistët shqiptarë u kanë premtuar emigrantëve “makina të shpejta dhe para që fitohen lehtë”.

Bandat e krimit shqiptar të gjeneratës së dytë me bazë në Britaninë e Madhe janë duke u kthyer në vendin e prindërve të tyre për të joshur në krim burrat e dëshpëruar, u ka thënë deputetëve dr. Andi Hoxhaj, një pedagog i drejtësisë në University College London.

Në prova me shkrim për një hetim të Komisionit të Përzgjedhur të Punëve të Brendshme për migracionin dhe azilin, Hoxhaj  ka thënë: “Rrjetet e krimit të organizuar me origjinë shqiptare me bazë në Mbretërinë e Bashkuar kanë shpërthyer në zonat rurale të Shqipërisë, ku ka varfëri ekstreme dhe/ose papunësi të lartë, për të joshur të rinjtë. Ata ofrojnë një udhëtim falas në Mbretërinë e Bashkuar në këmbim të punësimit në bujqësinë e kanabisit ose aktivitete të tjera kriminale. Pati një fushatë të suksesshme rekrutimi në vitin 2022 përmes mediave sociale në lidhje me çmimet e ulëta të ofruara nga varkat e vogla që kalojnë kanalin”, shkruan “Express.co.uk”.

Hoxhaj ka thënë se ishte vala më e madhe e emigracionit shqiptar që nga e para në vitin 1991, pas rënies së komunizmit dhe e dyta në vitin 1997, pasi shumë shqiptarë falimentuan dhe lufta civile kishte goditur vendin.

Po ashtu, ai ka thënë se një numër i madh i shqiptarëve u tërhoqën këtu sepse ata e shohin Mbretërinë e Bashkuar si “më pak raciste” se vendet e tjera evropiane.

Hoxhaj ka thënë se ka rreth 50 mijë shqiptarë në Britaninë e Madhe, por mund të ketë edhe më shumë.

Megjithatë, larg stilit të jetesës së premtuar “gangster”, shumë të rinj shqiptarë trafikohen në skllavëri moderne dhe detyrohen të paguajnë “tarifat e udhëtimit” në fermat e kanabisit.

Shumë shqiptarë të arrestuar janë mbajtur në qendrat e paraburgimit të emigracionit. Rreth 200 fëmijë emigrantë, kryesisht shqiptarë, mungojnë nga hotelet e financuara nga Home Office mes frikës se trafikantët i kanë marrë.