Të paktën tre persona u vranë dhe shumë të tjerë u plagosën kur persona të armatosur hapën zjarr gjatë një konference në spitalin më të madh publik të Haitit në Port-au-Prince. Sulmi ndodhi të martën, ndërsa gazetarët, mjekët dhe policët prisnin mbërritjen e Ministrit të Shëndetësisë, Lorthe Blema, për të shpallur rihapjen e spitalit.

Sipas raportimeve, dy gazetarë dhe një oficer policie janë ndër viktimat e konfirmuara. Sulmi u krye nga anëtarë të bandës “Viv Ansanm”, ndërsa pamje të publikuara në internet tregojnë njerëz të gjakosur brenda ndërtesës.

Spitali ishte rimarrë nga kontrolli i bandave nga qeveria në korrik, pas një periudhe të gjatë pushtimi dhe shkatërrimi. Megjithatë, situata mbetet kritike, pasi 85% e kryeqytetit Port-au-Prince vazhdon të jetë nën kontrollin e grupeve kriminale.

Shefi i këshillit presidencial të tranzicionit, Leslie Voltaire, dënoi sulmin dhe premtoi se autorët nuk do të mbeten të pandëshkuar. Ndërkohë, populli i Haitit vazhdon të vuajë nga dhuna e bandave, e cila është përshkallëzuar që nga vrasja e presidentit Jovenel Moïse në vitin 2021.

Kombet e Bashkuara raportojnë se mbi 5,000 njerëz janë vrarë vetëm këtë vit, duke e çuar vendin në prag të kolapsit.