Banka Botërore (BB) do të vazhdojë mbështetjen e mëtejmë të sektorit të bujqësisë dhe zhvillimit rural në Kosovë përmes projekteve të ndryshme bujqësore. Kjo bankë do të vazhdojë mbështetjen e Ministrisë së Bujqësisë edhe në kuadër të Programit për Bujqësi dhe Zhvillim Rural.

Kështu është thënë sot në takimin që ministrja e Bujqësisë, Dijana Ziviq ka pasur me menaxherin e Zyrës së Bankës Botërore në Kosovë, Marco Mantovanelli dhe specialisten e lartë të bujqësisë, Silvia Mauri.

Gjatë këtij takimi është biseduar për programet e ministrisë për mbështetjen e bujqësisë dhe zhvillimit rural në përgjithësi, si dhe për format e bashkëpunimit të mëtejmë në fushën e bujqësisë.

Ministrja Ziviq ka falënderuar menaxherin e Bankës Botërore ë në Kosovë për mbështetjen që kanë dhënë deri më tash për zhvillimin e sektorit të bujqësisë në Kosovë dhe ka theksoi se Ministria e Bujqësisë është e gatshme që të bashkëpunojë me BB-në edhe në të ardhmen për realizmin e shumë projekteve tjera.

Nga ana tjetër, menaxheri i Bankës Botërore, Marco Mantovanelli, ka vlerësuar zhvillimet e deritashme në avancimin e sektorit të bujqësisë në vend dhe ka rikonfirmuar gatishmërinë e kësaj banke për mbështetjen e mëtejmë të sektorit të bujqësisë dhe zhvillimit rural në Kosovë përmes projekteve konkrete në kuadër të strategjisë së për Kosovën.

/Epoka e re/