“Societe Generale”, banka e tretë më e madhe e Francës, ka bërë të ditur ditën e sotme se do të shkurtojë rreth 1.600 vende pune kryesisht në krahun e saj të korporatave dhe të investimeve, si pasojë e përpjekjes për të rritur rentabilitetin pas një ecurie të dobët nga viti i kaluar.

“SocGen” kishte njoftuar se do të shkurtojë rreth 500 milionë euro në bankën e saj të korporatave dhe investimeve në fillim të shkurtit, pasi rezultatet e tremujorit të katërt të tij u goditën nga një rënie e tregut, gjë që e detyroi atë të ulë dy qëllimet e rritjes së fitimit dhe të ardhurave .

“Që nga fillimi i shkurtit, ne kemi bërë një rishikim të të gjitha aktiviteteve të bankave të korporatave dhe të investimeve. Qëllimi ynë është rivendosja e përfitimit të biznesit mbi koston e kapitalit”, ka deklaruar Severin Cabannes, zëvendëskryetar i SocGen-it dhe kreu i krahut të saj të korporatave dhe investimeve, shkruan “Scantv”.

Shkurtimet e tjera të punës do të bëhen jashtë vendit, kryesisht në Nju Jork dhe në Londër, ku banka mund të pushojë njerëz. Pas viteve të normave të ulëta të interesit, kthimet e reduktuara për bankat me pakicë, SocGen, BNP Paribas, Deutsche Bank dhe bankat e tjera të mëdha evropiane janë mbështetur në të ardhurat më të paqëndrueshme nga bankat e korporatave dhe investimeve me rezultate të përziera.

Ndonëse aksionet e bankave të tjera evropiane kanë rënë përsëri gjatë këtij viti, aksionet e SocGen janë ende poshtë për më shumë se tre për qind, mes shqetësimeve mbi aftësinë paguese dhe rentabilitetin. Stoku ka humbur më shumë se 39 për qind gjatë 12 muajve të fundit.