Vajzat dhe gratë vazhdojnë të mbeten viktimat më të shpeshta të dhunës në familje. Bashkëshortët dhe anëtarët e tjerë të familjes në shumë raste ushtrojnë dhunë sistematike në mënyra të ndryshme ndaj tyre.

Ndihmën e Policisë dje e ka kërkuar një grua në Podujevë, e cila ka denoncuar bashkëshortin e saj.

Burimet e medieve kanë zbardhur detaje nga dëshmia e viktimës, e cila ka pohuar se, pas një konflikti me të shoqin, ai s’e ka lënë të futet brenda shtëpisë ku bashkëjetojnë.

Si rezultat i denoncimit të 22-vjeçares, i dyshuari është shoqëruar në stacion policor, ku është intervistuar nga organet e hetuesisë.

Me urdhër të prokurorit ndaj të dyshuarit është iniciuar rasti për veprën penale ‘Dhunë në familje’.