Bashkimi ka shënuar fitore ndaj Prizrenit 16 me rezultat 104:76 (20:22, 26:21, 25:20, 33:13), në xhiron e 27-të të Art Motion Superligës së Kosovës në basketboll.

Prizreni 16 e nisi më mirë ndeshjen, duke pasur deri në nëntë pikë epërsi në çerekun e parë, 13:22, megjithatë shtatë pikë radhazi nga vendasit bënë që kjo pjesë të përfundojë 20:22. Periudha e dytë ishte e barabartë dhe u karakterizua me rezultat të ngushtë, ndërsa pjesa e parë përfundoi 46:43.

Basketbollistët e Bashkimit vazhduan me lojë të mirë edhe në periodën e tretë, ku arritën epërsi deri në 13 pikë, 71:58, ndërsa rezultati në semafor pas 30 minutash ishte 71:63.

Në dhjetë minutat e fundit dominuan totalisht Portokallezinjtë, si në mbrojtje, ashtu edhe në sulm për të thelluar edhe më shumë epërsinë dhe për të triumfuar në fund 104:76.

Te Bashkimi u dalluan Valon Bunjaku me 21 pikë e gjashtë asistime dhe Alban Veseli me 25 pikë e pesë kërcime, kurse te Prizreni 16 u dallua Arti Hajdari me 20 pikë.

Bashkimi ka 11 fitore e 16 humbje, kurse Prizreni 16 ka 15 fitore e 12 humbje.