Diplomati shqiptar, Lisien Bashkurti, përfaqësues i Këshillit të Ambasadorëve në Shqipëri, në studion e lajmeve të “Ora News”, ka komentuar zhvillimet e fundit në Kosovë. Ai e nisi bisedën e tij me letrën dërguar presidentit Trump, ku sqaroi qëllimin e saj, ku sipas Bashkurtit kërkohet që në procesin e dialogut me Serbinë të ruhet integriteti territorial i Kosovës.

“Procesi i bisedimeve ka qenë me ulje-ngritje vitet e fundit. Tani duket se ka një rikthim të vëmendjes, ka një ngritje të koncentrimit të politikës së jashtme të Shtëpisë së Bardhë dhe Brukselit. Rikthimi i dialogut duket se është një çështje e përbashkët e faktorëve ndërkombëtarë, shqiptarë dhe serbë. Mesazhi i letrës është se faktori shqiptar mbështet iniciativat e Shtëpisë së Bardhë dhe ka besim te ajo. Ne si anëtarë të Këshillit të Ambasadorëve se parimet e negocimit që ka kristalizuar paketa Ahtisari, jo rikthim të Kosovës në statusin e para 1999, jo copëtim dhe jo bashkim të Kosovës me një shtet, janë parime bazë për njohjen reciproke me Serbinë.  Në letrën e Këshillit Ambasadorial është theksuar jo copëtimit të Kosovës, ajo mbetet një nga parimet kryesore për ruajtjen e paqes dhe stabilitetin. Krizat e bazuara mbi territorialitetin janë vërtetuar në Ballkan që kanë tensione dhe luftëra. Nëse duam Ballkan të qëndrueshëm, duhet të ruhen kufijtë pa u cenuar duke pasur parasysh dhe kufijtë e Kosovës”, ka theksuar Reka.

Më tej, ai foli dhe për koalicionin midis Vetëvendosjes dhe LDK-së. Sipas Bashkurtit, sfida e përbashkët është dialogu me Serbinë, ndërsa tha se në këtë pikë të dyja palët kanë treguar se kanë të njëjtën qasje. “Koalicioni LV-LDK është në stabilizimin e qeverisjes së tij, ka konstituuar institucionet e veta, është në proces reformimi të administratës publike. Në politikën e jashtme dhe dialogun me Serbinë, dy partnerët kanë qenë përgjithësisht në një qasje. Kanë pasur nuanca. Natyrisht mbetet sfidë e qeverisë Kurti që të ruajë unitetin politikë të koalicionit. Çështja e politikës së jashtme është çështje kombëtare. Dialogu me Serbinë lidhet me të ardhmen e Kosovës. Kurti duhet të shmang gabimet e të shkuarës. Kjo mbetet sfidë për qeverinë e Kurtit”, ka thënë Bashkurti.

Ai foli dhe për taksën ndaj mallrave serbe. Sipas Bashkurtit taksa ishte një vendim i drejtë i qeverisë së kaluar, sepse u vendos në një moment që Serbia kishte shtuar presionin ndaj Kosovës.

Ai thotë se ajo duhet të hiqet gradualisht. “Këtu ka pasur debat shumë të madh. Unë mendoj se është një furtunë në gotë. Tarifa u vendos në rrethana shumë të vështira për Kosovën, kur Serbia rriti revanshin duke shkelur marrëveshjet me Brukselin. Ajo u bë pengesë kryesore, ndërsa një pjesë e marrëveshjes të ratifikuara nuk janë firmosur sepse Serbia nuk e njeh Kosovën. Megjithëse nuk ka qenë taks e pakushtueshme për Serbinë, mendoj se ka qenë shumë e dobishme për Kosovën. Ajo ka tërhequr vëmendjen e faktorit ndërkombëtar. Tani dinamikat ndryshojnë. Unë mendoj se qeveria Kurti ka bërë dy lëvizje të dobishme, megjithëse taksa u vu menjëherë ajo do të hiqet gradualisht. Nga ana tjetër të shikohet që Serbia duhet të plotësojë disa kushte në këmbim të kësaj takse. Këto duhet të jenë konkrete dhe të arritshme. Shikojë një rritje të presionit dhe brenda dhe jashtë Kosovës për heqjen e taksës”, është shprehur ai.

Bashkurti ka theksuar se marrëveshja përfundimtare Kosovë-Serbi do të parashikonte zgjidhjen e një tërësie problemesh teknike, ekonomike dhe politike. “Marrëveshja do të ketë dy kapituj kryesor: komponent ekonomik, ku parashikohen një sërë investimesh ndërkombëtare të huaja. Komponenti i dytë do të jetë në kuadrin politikë ku palët do të shkojnë në reciprocitetin e njohjes midis tyre. Serbia duhet të ndalojë fushatën agresive për tërheqjen e njohjeve ndërkombëtare të Kosovës, ndërsa nga ana tjetër Kosova duhet të jetë e përgatitur për të realizuar një marrëveshje”, ka deklaruar Bashkurti.