Analisti Baton Haxhiu, gjatë emisionit “Pressing”, ka bërë një krahasim interesant midis Ramush Haradinajt dhe Albin Kurtit. Ai deklaroi se për ekonominë, Haradinaj është si “Bill Clintoni” krahasuar me Kurtin. Ky vlerësim vjen në kontekstin e debatit për qasjen e liderëve ndaj zhvillimit ekonomik dhe politikave shtetërore në Kosovë.

Në tubimin me banorët e Grabanicës, Haradinaj theksoi se koha e heroizmave dhe improvizimeve ka kaluar dhe se Kosova duhet të ecë përpara drejt zhvillimit dhe standardeve të vendeve si Kroacia, Sllovenia dhe Shqipëria. Ai kritikoi ashpër qeverisjen e Albin Kurtit, duke e cilësuar atë si një periudhë izolimi dhe varfërie për Kosovën.

“Ne nuk duhet të jetojmë për hatër të dikujt që do të mbetet në pushtet dhe që përpiqet të shërojë komplekset e veta duke mbajtur Kosovën të izoluar dhe të varfër,” deklaroi Haradinaj.

Duke folur për planin e tij, Haradinaj premtoi përfundimin e projekteve madhore infrastrukturore si rruga tranzitore që lidh Klinën me Istogun dhe Skenderajn, ndërtimin e impiantit të ujërave të zeza dhe zhbllokimin e rrugës për Gjakovë.

Haradinaj u zotua gjithashtu për një rritje të ndjeshme të buxhetit të mbrojtjes, duke e çuar atë mbi 4% të GDP-së, anëtarësim të drejtpërdrejtë në NATO dhe sigurimin e energjisë së lirë përmes gazit amerikan. Premtimet ekonomike përfshijnë paga minimale prej 500 eurosh, paga mesatare 1000 euro dhe një fokus të veçantë në zhvillimin ekonomik.