Pas muajsh negociatash për rinovimin e kontratës, klubi gjerman ka vendosur të tërheqë ofertën që kishte vendosur mbi tryezë.

Sipas “Bild”, mesfushori 30-vjeçar, të cilin ish-CEO i Bayernit, Karl-Heinz Rummenigge, e quajti në vitin 2020 “kapiteni i së ardhmes”, mund të largohet si lojtar i lirë këtë verë.

Drejtuesit bavarezë i kanë komunikuar lojtarit në fillim të javës që oferta nuk është më e vlefshme, kryesisht për shkak të pasigurisë së tij të vazhdueshme. Klubi kërkon një përgjigje përfundimtare “po” ose “jo”, pa vazhduar më tej negociatat për detajet e kontratës.

Fillimisht, Bayerni synonte të ulte pagën e tij, por performanca e lartë e lojtarit këtë sezon i bëri të ndryshonin qëndrim. Madje, oferta e fundit e klubit ishte më e mirë se kontrata e tij aktuale, në të cilën Kimmich përfiton rreth 20 milionë euro në vit.

Në mbledhjen e Këshillit Mbikëqyrës, të hënën e kaluar, u diskutua sërish situata e Kimmich dhe u vendos që oferta të mos përmirësohet më dhe të tërhiqet për shkak të mungesës së përgjigjes nga lojtari.

Çfarë do të ndodhë me Kimmich?

Pavarësisht këtij zhvillimi, bisedimet mes palëve vazhdojnë, por nuk është e qartë nëse Bayerni do të ofrojë përsëri të njëjtat kushte.

Kimmich tani ndodhet në një udhëkryq dhe duhet të marrë një vendim të rëndësishëm për të ardhmen e tij. Ndërkohë, mbetet e paqartë se cilat klube elitare janë realisht të interesuara për ta transferuar.

Në të kaluarën, mesfushori gjerman është përfolur për një kalim te Real Madrid dhe Barcelona, ndërsa disa media gjermane kanë raportuar edhe për interesimin e klubeve të tjera të mëdha evropiane.

Megjithatë, situata mbetet e pazgjidhur dhe ndërsa dera për një rinovim nuk është mbyllur plotësisht, mundësia që Kimmich të largohet nga Bayern pa sjellë asnjë euro në arkat e klubit është gjithnjë e më reale.