Bashkimi Demokratik për Integrim (BDI) ka njoftuar për fillimin e një procesi të gjithanshëm reformash dhe vetingu brenda partisë, të udhëhequr nga kryetari i partisë, Ali Ahmeti dhe kryesia e partisë.

Në njoftimin për medie, theksohet se kjo nismë nënvizon përkushtimin e BDI-së për qeverisje dhe integritet shembullor, duke vendosur një standard të ri për partitë politike në rajon.

“Si pjesë e strategjisë së reformës, BDI po zbaton mekanizma konkretë që synojnë rritjen e transparencës dhe llogaridhënies brenda radhëve të saj. Deputetët e BDI-së i janë nënshtruar një vlerësimi të rrezikut të korrupsionit dhe kanë nënshkruar Kodin e Praktikës së Mirë dhe Integritetit të BDI-së. Ky kod përputhet me Kodin e Praktikës së Mirë në Fushën e Partive Politike, të miratuar nga Rezoluta e Komisionit të Venecias dhe e Asamblesë Parlamentare të Këshillit të Evropës (PACE)”, ka njoftuar BDI.

Më tej në njoftim thuhet se BDI-ja është e vendosur të zgjerojë këtë proces të vetingut përtej nivelit parlamentar, duke synuar të gjithë zyrtarët e nivelit të lartë të partisë, anëtarët e Kryesisë së BDI-së dhe kryesinë lokale të degës së partisë. “Ky plan strategjik veprimi synon jo vetëm të përforcojë qëndrimin e partisë kundër korrupsionit, por edhe të nxisë një kulturë integriteti brenda proceseve politike.

Duke udhëhequr me këto reforma, BDI krijon një precedent për të ndjekur partitë e tjera politike. Kjo nismë ripohon përkushtimin e BDI-së për sundimin e ligjit dhe tregon përkushtimin e partisë për të trajtuar korrupsionin në rrënjët e tij”, thuhet ndër tjera në njoftim.

Theksohet se kryetari Ali Ahmeti ka thënë se BDI-ja është e përkushtuar në ndërtimin e integritetit të jashtëzakonshëm institucional dhe personal “Qasja jonë është gjithëpërfshirëse dhe e mirëplanifikuar, duke u fokusuar tek individët me integritet të fortë, të cilët do të mbrojnë agjendën kundër korrupsionit dhe procesin e vetingut”, ka thënë Ali Ahmeti.

Thuhet se nëpërmjet veprimeve strategjike dhe angazhimit të palëkundur, BDI mbetet e përkushtuar në vendosmërinë e saj për të udhëhequr me shembull me qëllimin përfundimtar për të realizuar ndryshime domethënëse brenda partisë dhe, në fund të fundit, në kuadrin kombëtar të qeverisjes.