Shtetasit nga vendet e Ballkanit Perëndimor nuk do të mund të udhëtojnë lirisht drejt vendeve të Bashkimit Europian të paktën deri më 1 gusht të këtij viti.

Këshilli Europian publikoi në faqen zyrtare në internet vendimin, ku nuk përfshin asnjë nga shtetet e rajonit në listën e vendeve për të cilat hiqen masat kufizuese të lëvizjes për shkak të pandemisë së COVID-19, ku sërish Shqipëria është lënë jashtë.

Ndryshe, nga vendimi i mëparshëm i fillim korrikut, kësaj here vendeve që nuk u lejohet të lëvizin drejt BE-së, pos Maqedonisë – iu bashkohen edhe Serbia dhe Mali i Zi. Listës së vendeve jo-anëtare që u hiqen kufizimet e udhëtimit në kushtet e pandemisë u shtohen vende afrikane si Algjeria, Maroku, Ruanda e Tunizia.

Po ashtu aty përfshihen tashmë edhe Kina, Australia, Zelanda e Re, Kanadaja, Gjeorgjia, në total 13 vende.

Krahas Kinës që është subjekt i masave të reciprocitetit, për këto vende thuhet se vendimi u mor pas përmirësimit të situatës së koronavirusit.

Kufijtë mbyllur me vendet e rajonit i mban edhe Greqia, që në dallim me vendet e tjera të unionit, e lejon hyrjen pa kufizim vetëm në aeroportin e Athinës, të shtetasve rezidentë në Greqi dhe vende të tjera të Bashkimit Europian.

Vendimi për kufijtë rinovohet çdo dy javë në bazë të ecurisë së situatës së pandemisë në vendet përkatëse jo-anëtare.