Sipas Fondit Monetar Ndërkombëtar (FMN), Kosova është ekonomi në zhvillim me rritje mesatare të bruto prodhimit vendor (BPV) prej 4.2 për qind në pesë vitet e fundit, që është ndër më të lartat në Ballkanin Perëndimor. Por duke pasur parasysh rritjen e popullsisë prej rreth 2 për qind çdo vit, përmirësime të tilla në rritjen për frymë banori në Kosovë janë të parëndësishme.

Popullsia e Kosovës përllogaritet në rreth 1.793,467 banorë, ku popullsia në moshë pune prej 1.202,982 përfaqëson rreth dy të tretat e popullsisë totale.

Sipas të dhënave nga Agjencia e Statistikave të Kosovës (ASK), edhe tani Kosova ka një nga shkallët më të larta të papunësisë në rajon në 30.5 për qind dhe gjithashtu, 63.5 për qind e grave në fuqinë punëtore janë të papunësuara. Faktori gjinor është gjithashtu një tregues i rëndësishëm se gratë në pozitë të pafavorizuar në krahasim me meshkujt në të gjitha nivelet e arsimimit, pra kanë më shumë gjasa të bëhen apo të mbeten të papunësuara.

Për më tepër, edhe personat me aftësi të kufizuara përballen me kufizime që ndikojnë dukshëm në statusin e tyre të punësimit dhe një përqindje e madhe e tyre janë të papunësuar.

Pavarësisht faktit se 43 për qind e personave me aftësi të kufizuara (PAK) shfaqin interesim ose kanë potencialin të zhvillojnë shkathtësitë e tyre, sipas Ministrisë për Punë dhe Mirëqenie Sociale shkalla e punësimit të personave me aftësi të kufizuara (PAK) është 6,47 për qind.

Në reagim ndaj këtyre nevojave të menjëhershme për punësim, Zyra e Bashkimit Evropian në Kosovë ka dizajnuar dhe lansuar skemën e granteve prej 3.5 milionë euro, të titlluar: “Përmirësimi i qasjes në tregun e punës për grupet e pafavorizuara përmes ndërmarrjeve sociale dhe masave aktive të tregut të punës”.

Kjo skemë e granteve synon të mbështesë masa aktive shtesë për tregun e punës, si përkrahje e përshtatur sipas nevojave për aftësim, trajnim në vendin e punës, praktikë dhe vetëpunësim, për grupet e pafavorizuara në Kosovë.

Gjithashtu, përmes kësaj mbështetjeje, BE-ja synon të përkrahë zhvillimin e ndërmarrjeve sociale si mundësi për krijimin e perspektivave për punës sidomos për grupet më të cenueshme në tregun e punës, meqë ndërmarrjet sociale u ndihmojnë interesave të komunitetit (objektivave sociale, të shoqërisë dhe mjedisore) dhe jo maksimizimit të përfitimeve.
Objektivat specifike të kësaj thirrjeje për propozime janë: Përkrahja për zhvillimin e ndërmarrjeve sociale në Kosovë; Përkrahja për avancimin e punësimit të grupeve të pafavorizuara, kryesisht gratë dhe të rinjtë.