Bilall Sherifi

Duke folur para gazetarëve në “Konferencën e Pranimit Ministrorë BE-Serbi”, Komisionari evropian për Zgjerim dhe Fqinjësi të Mirë, Johannes Hahn, deklaroi se “taksa prej 100 për qind për mallrat e importuara nga Serbia dhe Bosnja e Hercegovina është kundër frymës së tregtisë së lirë të CEFTA-s” dhe kundër frymës së bashkëpunimi rajonal, i cili mund të zhvillohet vetëm nëpërmjet tregtisë së lirë, lëvizjes së lirë të mallrave dhe lëvizjes së lirë të njerëzve”.

Që nga koha kur BE-ja ka marrë rolin e ndërmjetësuesit në bisedimet Kosovë-Serbi nuk kemi pasur një kontekst të tillë që mundësoi nxjerrjen në shesh të logjikës së dyfishtë të sjelljes nga ana e disa përfaqësuesve të BE-së. Vendosja e taksave për produktet e Serbisë dhe të Bosnjës e Hercegovinës shërbeu për të përdorur një mori formash të presionit ndaj Kosovës, duke na i kujtuar parimet themelore dhe vlerat mbi të cilat mbështetet BE-ja.

Meqenëse jemi te parimet dhe vlerat që mishërojnë institucionet e BE-së dhe spekulohet rreth asaj se kush i shkel këto parime, atëherë po rikujtoj me sa vijon:

-Të gjitha ankesat që janë bërë nga ana e Kosovës për mosrespektimin e marrëveshjeve të nënshkruara në Bruksel kanë gjetur një trajtim mospërfillës nga ana e Serbisë.

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të respektuar marrëveshjen për energji, përgjigjja ishte e qartë: “problemet të zgjidhen në kuadër të dialogut Kosovë-Serbi”;

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të ndërprerë minimin e përpjekjeve të Kosovës për anëtarësim në institucionet dhe organizatat ndërkombëtare përgjigja ishte e njëjtë: “problemet të zgjidhen në kuadër të dialogut Kosovë-Serbi”;

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të ndërprerë financimin e strukturave ilegale në Kosovë, përgjigjja e njohur na nxirrej përpara: “problemet të zgjidhen në kuadër të dialogut Kosovë-Serbi”;

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të ndërprerë presionet ndaj pjesëtarëve të përkatësisë etnike serbe në institucionet e Kosovës kishim përgjigjen tanimë të njohur: “problemet të zgjidhen në kuadër të dialogut Kosovë-Serbi”;

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të hequr barrierat që u vendoseshin produkteve dhe ndërmarrjeve të Kosovës kërkohej nga Kosova që “problemet të zgjidhen në kuadër të dialogut Kosovë-Serbi”;

-Kur autoritetet e Kosovës kërkonin nga institucionet e BE-së të ndërhynin tek autoritetet e Serbisë për të respektuar parimet për lëvizjen e lirë të mallrave, lëvizjen e lirë të mjeteve dhe lëvizjen e lirë të njerëzve nga Kosova na thuhej që “problemet të zgjidhen në kuadër të dialogut Kosovë-Serbi”;

-Me një fjalë, sa herë që autoritetet e Kosovës kërkonin nga institucionet e BE-së të ndërhynin tek autoritetet e Serbisë për të respektuar marrëveshjet, përfaqësuesit e BE-së e përsëritnin të njëjtën gjë: “problemet të zgjidhen në kuadër të dialogut Kosovë-Serbi”.

Autoritetet e Kosovës u kanë bërë me dije të gjitha institucioneve ndërkombëtare dhe shteteve veç e veç se taksa e vendosur për produktet e Serbisë dhe Bosnjës e Hercegovinës është çështje që mund të zgjidhet vetëm në kuadër të pakos së përgjithshme të dialogut Kosovë-Serbi.

Vetëm duke ndenjur neutrale ndaj “çështjes së taksës” dhe duke kërkuar që sikur të gjitha çështjet tjera, “edhe ky problem të zgjidhet në kuadër të dialogut Kosovë-Serbi”, BE- ja mund të luaj rolin e ndërmjetësuesit të paanshëm dhe t’ia heqë vetes logjikën e matjes me dy kute.

Në kohën kur Kosova i plotësoi të gjitha kushtet për heqjen e regjimit të vizave ndaj qytetarëve të Kosovës, getoizimi i qytetarëve të Kosovës nuk është në frymë të bashkëpunimit rajonal dhe as në përputhje me parimin për qarkullimin e lirë të njerëzve, ideve dhe mallrave që qëndron në themelet e vlerave demokratike.

Do të kishte qenë mirë që Komisionari Johanes Hahn dhe të gjithë përfaqësuesit tjerë të BE-së që kanë ndjekur angazhimet e Kosovës në këtë proces, të angazhohen për të dëshmuar se edhe në rastin e Kosovës BE-ja funksionon në përputhje me parimet e veta. Deri tani realiteti dëshmon logjikën e dyfishtë dhe matjen me dy kute!