Delegacioni i Bashkimit Evropian (BE) në Tiranë ka reaguar ashpër për protestën e opozitës, që do të zhvillohet mbrëmjen e sotme, duke iu kërkuar të gjitha palëve politike të angazhohen urgjentisht në dialog.

BE-ja u ka bërë thirrje krerëve të opozitës të zhvillojnë një protestë paqësore, duke i paralajmëruar se nuk do të tolerohet dhuna.

Në deklaratën e publikuar në rrjetin social në “Facebook”, delegacioni i BE-së ka theksuar se është përgjegjësi e drejtpërdrejtë e liderëve të protestës që të sigurojnë një tubim pa përplasje e tensione.

Deklarata e plotë e delegacionit të BE-së:

Ne e respektojmë dhe e mbështesim plotësisht të drejtën themelore të qytetarëve të Shqipërisë për të demonstruar. Në të njëjtën kohë, vazhdojmë të theksojmë rëndësinë e ushtrimit të kësaj të drejte në mënyrë të rregullt dhe paqësore.

Ne jemi të shqetësuar nga episodet e fundit të dhunës që kanë ndodhur në disa rajone të vendit. Asnjë akt i dhunshëm apo formë e nxitjes për dhunë nuk mund të tolerohen në asnjë rrethanë.

Është përgjegjësi e drejtpërdrejtë e liderëve të protestës për të siguruar që demonstrimet sonte të mbahen në mënyrë të sigurt si për pjesëmarrësit ashtu dhe për banorët Tiranës, si dhe për të shmangur çdo përshkallëzim gjatë protestave.

Përdorimi i eksplozivëve apo i çdo sendi tjetër që mund të shkaktojë lëndime është krejtësisht i papranueshëm. Autoritetet e zbatimit të ligjit gjithashtu kanë përgjegjësinë që të vazhdojnë të veprojnë me përmbajtje, edhe nëse provokohen.

Ne vazhdojmë t’i bëjmë thirrje të gjitha palëve për të treguar vullnet të fortë politik dhe për t’u angazhuar urgjentisht në një dialog konstruktiv për të kapërcyer situatën politike aktuale, si dhe për të mbështetur dhe konsoliduar progresin e bërë nga Shqipëria në procesin e reformave.