Kryetari i Komunës së Malishevës, Ragip Begaj, i shoqëruar edhe nga shefi i Drejtorisë për Arsim dhe Edukim, Halim Hoti, kanë vazhduar edhe të mërkurën t’i vizitojnë shkollat në disa fshatra, me qëllim të njoftimit me procesin mësimor në përgjithësi, dhe në veçanti me kushtet që janë në shkolla, mirëmbajtjen, sidomos pas fillimit të zbatimit të masave për kujdes të shtuar ndaj koronavirusit, si dhe me nevojat që i kanë shkollat në përgjithësi.

“Zbatimi i rekomandimeve nga institucionet përgjegjëse shtetërore, si masa preventive ndaj virusit që shfaqur në vendet përreth, është i domosdoshëm, e po ashtu edhe mbajtja e ligjëratave për kujdesin në raport me këtë virus kanë rëndësi të madhe”, ka thënë Begaj.

Gjatë këtyre vizitave, që i kanë bërë në shkollat në Kijevë, Bubavec, Lubizhdë dhe Mirushë, Begaj e Hoti, janë njoftuar nga drejtuesit e shkollave apo mësimdhënësit, me marrjen e këtyre masave, si dhe me nevojat që kanë shkollat në përgjithësi.

Është theksuar se bazuar në gjendjen aktuale, mirëmbajtja e shkollave është në nivel të lartë dhe përgjegjësit janë duke u kujdesur maksimalisht.

Po ashtu, mësimdhënësit nëpër shkolla, janë duke e përcjellë edhe gjendjen e nxënësve në përgjithësi, nëse kanë ndryshime si pasojë e gripit sezonal, por deri më tani nuk ka vend për panik.

/Epoka e re/