Kryetari i Komunës së Skenderajt, Bekim Jashari, ka thënë se “Epopeja e UÇK-së”, në nderim të veprës dhe sakrificës sublime të komandantit legjendar të Ushtrisë Çlirimtare të Kosovës, Adem Jashari, familjes Jashari dhe të rënëve tjerë të lagjes, po shënohet në mënyrë madhështore nga personalitete të lartë shtetërore të Republikës së Kosovës, përfaqësues të shoqatave të dala nga lufta, delegacione komunash dhe qytetarë nga katër anët e shqiptarisë, në 21-vjetorin e rënies heroike të kryetrimit kombëtar.

“Rënia e Adem Jasharit, për lirinë e vendit tonë, na obligon të jemi të bashkuar si kurrë më parë, dhe ta avancojmë ndërtimin e Kosovës, ku pasardhësit tanë të jetojnë në të mira e begati! Lavdi e përjetshme sakrificës së Adem Jasharit, familjes së tij, dëshmorëve të kombit, martirëve dhe gjithë të rënëve tjerë për lirinë e Kosovës”, ka shkruar kryetari Jashari në llogarinë e vet në “Facebook”.

/Epoka e re/