Mbase dueli i veçuar i fazës së 1/8 së finales në Euro 2020 do të zhvillohet në Sevillë të dielën mbrëma, me Belgjikë në formë kundër kampiones aktuale evropiane, Portugalisë.

Takimi mes Belgjikës dhe Portugalisë do të zhvillohet në orën 21:00 në stadiumin  Estadio de La Cartuja në Sevillë.

Belgjika i fitoi të gjitha tri ndeshjet në Grupin B, duke e fituar grupin për t’u kualifikuar në 1/8 e finales, ndërsa Portugalia u kualifikua si e treta në Grupin F pas Francës dhe Gjermanisë.

Belgjika, që është në një ecuri prej 12 fitoreve radhazi në të gjitha garat, nuk ka shkuar më larg se çerekfinalja në Euro që prej vitit 1980 kur e kishte arritur gjysmëfinalen.

Portugalia, ndërkohë, do të kërkojë të mbetet në turne për ta mbrojtur trofeun evropian që e fitoi më 2016.