E ashtuquajtura Zyra për Kosovën në Qeverinë e Serbisë ka njoftuar të mërkurën se drejtorit të saj, Petar Petkoviq, i është ndaluar vizita në Kosovë për “të qenë pranë serbëve për Vidovdan”.

“Që një vit e gjysmë, Petkoviqit është duke iu ndaluar dhëtimi në Kosovë dhe kremtimi i festave më të mëdha me serbët në provincë dhe mbështetja e tyre për shkak të ndalesave të jashtëligjshme nga Prishtina”, është thënë në njoftimin e kësaj zyre

Sipas kësaj zyre, vizita e tij është paralajmëruar në “përputhje me të gjitha marrëveshjet e vlefshme për lëvizje të lirë” dhe se qëllimi i vizitës ishte kryekëput “i natyrës fetare”, por kryeministri i Kosovës, Albin Kurti, “e ndaloi vizitën dhe kështu i shkeli të gjitha arritjet e bisedimeve në Bruksel”.

Autoritetet në Kosovë, deri më tash, nuk kanë dhanë ndonjë njoftim.

Serbët nga Kosova, Serbia dhe vendet e rajonit tradicionalisht festojnë Vidovdanin çdo 28 qershor në Gazimestan – rreth 10 kilometra larg Prishtinës.

Në vitet e kaluara ka pasur edhe arrestime për “nxitje të urrejtjes fetare dhe kombëtare”.

Zyra serbe e akuzoi Kurtin se me ndalimin e Petkoviqit “deshi të tregonte se nuk është i interesuar për normalizimin e marrëdhënieve”, në ditën kur ai dhe presidenti serb, Aleksandër Vuçiq ndodhen në Bruksel për një takim të ri të dialogut të ndërmjetësuar nga Bashkimi Evropian.

Vidovdani është gjithashtu një festë fetare, që e shënon Kisha Ortodokse Serbe, si përkujtim të vuajtjeve të serbëve në betejën kundër ushtrisë turke në Kosovë, në vitin 1389.

Vitin e kaluar, qytetarë serbë u mblodhën në Mitrovicë të Veriut dhe në Graçanicë, ku është paraqitur një dokument i quajtur “Deklarata e Vidovdanit”.

Në deklaratën, që e kanë lexuar zyrtarë të partisë më të madhe serbe në Kosovë – Lista Serbe – thuhej se komuniteti serb në Kosovë ishte “i ekspozuar ndaj dhunës”.

Vitin e kaluar, Vidovdani nuk është festuar në Gazimestan, pasi Dioqeza e Rashkës dhe Prizrenit e Kishës Ortodokse Serbe kishin vendosur ta mbajnë atë në Manastirin e Graçanicës për shkak të përkeqësimit të situatës së sigurisë në Kosovë.

Gazimestani në Kosovë njihet edhe për fjalimin e ish-presidentit të Serbisë, Sllobodan Millosheviq, i cili, më 28 qershor 1989, nuk i kishte përjashtuar “betejat e armatosura”.

Ai fjalim i Millosheviqit ishte parë nga shumë njerëz si paralajmërim i luftërave që pasuan në vitet ‘90 në ish-Jugosllavi.

Në të njëjtën ditë në vitin 2001, Millosheviq ishte ekstraduar në Tribunalin e Hagës, i cili e pati akuzuar atë për krime lufte. Ai ka vdekur në paraburgim në vitin 2006, para gjykimit përfundimtar. /REL