Deputeti i Partisë Demokratike të Kosovës (PDK), Hisen Berisha, i ka ashpërsuar kritikat ndaj qeverisë Kurti.

Ai ka bërë me dije se në qeverinë Kurti janë riinstaluar njerëz të regjimit të Serbisë.

Sipas tij, Kuvendi duhet të miratojë Ligjin e lustracionit.

“Duhet një spastrim. Prandaj duhet lustracioni. Ka njerëz që kanë qenë në listat e Millosheviqit dhe kanë ardhur në pozitat e zëvendësministrave në qeverinë tonë. Janë më emra me mbiemra dhe e sheh Ministrinë e Shëndetësisë, Ministrinë e Arsimit. Pra, ky është shqetësimi që duhet të kemi ne. Ne na është riinstaluar dhe një herë pjella komuniste e regjimit të Serbisë. Kjo kategori është e instaluar në të gjitha institucionet e shërbimet e inteligjencës” ka thënë Berisha në një intervistë për “Euronews Albania”.

Ai ka përmendur edhe veprimet e qeverisë Kurti, që, sipas tij, nuk janë në interes kombëtar.

“Nuk mund të bëhet shteti me pjesëtar të Serbisë brenda tij. Nuk është tragjikë që kanë qenë bashkëpunëtor, se nuk kishin ku të shkonin, por tani nuk mund të vrapojnë për të qenë pjesë e vendimmarrjes. Kanë bërë dhe thirrje që t’i përjashtojnë veteranët nga paga minimale. Këto janë kategoria që luftuan që të kemi shtet e tani, na vijnë këto të Serbisë e duan te degjenerojnë dhe këtë kategori”, ka thënë Berisha.