Deputeti i Aleancës për Ardhmërinë e Kosovës (AAK) dhe kryetari i Komisionit për Çështje të Sigurisë, Bekë Berisha, ka folur për paralajmërimet për sulme të reja nga ana e Serbisë ndaj Kosovës, pas sulmit terrorist të Banjskës, që ndodhi tre muaj më parë në veri të vendit.

Ai ka thënë se rrezikshmëria është e lartë dhe në ngritje për sulme të ngjashme.

“Përderisa kemi pasur një sulm në veri, ka rrezik të përsëritjes së sulmeve të ngjashme. Mund të them se rrezikshmëria është e lartë dhe në ngritje, sipas raporteve inteligjente”, ka thënë Berisha për “Blic”..

Por, a është Kosova e përgatitur për sulme terroriste të llojit çfarë kemi pasur më herët?

Berisha ka thënë se duhet pasur informacione të sakta nga inteligjenca e raporte të mira me KFOR-in.

“Është e rëndësishme të kemi informacion të saktë nga inteligjenca. Është me rëndësi të kemi raporte dhe të ndjekim një strategji të përbashkët me forcat e KFOR-it, sidomos ato amerikane”, ka vlerësuar Berisha, duke shtuar  se “në siguri nuk lejohen blofet as populizmat nga ana jonë, nga qeveria.”

Po ashtu, ai ka thënë se duhet të kihet besim se situata tejkalohet në koordinim me perëndimin.

“Dhe e fundit, ne duhet të kemi besim dhe këtë situatë ta tejkalojmë bashkë të radhitur me perëndimin”, ka thënë Berisha.

Ndryshe, paralajmërime për sulme të reja nga Serbia kanë dhënë se fundi kryeministri i Kosovës, Albin Kurti dhe ministri i Brendshëm, Xhelal Sveçla.