Deputeti i Partisë Demokratike të Kosovës (PDK), Hisen Berisha, ka deklaruar se janë provokuar rëndë nga zëvendëskryeministri Besnik Bislimi.

Ai ka thënë se eskalimi i situatës në sallën plenare në mes të deputetëve dhe ministrave nuk i bën mirë Kuvendit.

Berisha ka thënë se Kryesia e PDK-së do të mblidhet shpejt për të marrë vendim se si të veprohet tutje. Sipas tij, me këtë frymë nuk do të vazhdohet Kuvendi.

“Ky eskalim nuk i bën mirë as Kuvendit, as demokracisë, as qytetarëve të Kosovës që presin diçka tjetër. Është dashur këta moralisht të dorëhiqen. Të paktën për çështje morale të dorëhiqen edhe t’i hapin rrugë një procesi zgjedhor qe do të sillte një qeveri gjithëpërfshirëse”, ka thënë ai.

Berisha ka mohuar se kanë penguar që kryeministri Albin Kurti të largohet nga salla e Kuvendit, ndërkohë që ka theksuar se janë provokuar nga zëvendëskryeministri Besnik Bislimi.

“Kush është ka e ndalon me dalë jashtë. Nuk është e vërtetë. Futuni në sallë, krejt kjo pjesa këtej është e lirë. Nuk është bllokuar askush. Dy palët e kanë uzurpuar foltoren. Sepse ai po shpif dhe Bislimi, ai kryenegociatori i tradhtive doli e hoqi një fotografi dhe goditi me shishe një deputet të PDK-së e gjuajti me shishe. Po, provokoi rëndë sepse karakteri i tyre, ndërgjegjja e tyre në çka e kanë esklauar këta në bashkëpunim me Radoiçiqa, me kriminelë të deklaruar edhe nga Departamenti Amerikan i Shtetit në listë të zezë, të shpallur terroristë nga kjo qeveri, bashkëpunojnë me këta terroristë”, ka thënë Berisha. /Ksp