![](https://www.epokaere.com/wp-content/uploads/2021/06/kurti-e-bernabiq.jpg)
Bërnabiq: Deklarata e Kurtit mund të shkaktojë trazira
Kryeministrja e Serbisë, Ana Bërnabiq, ka thënë sot se deklarata e kryeministrit të Kosovës, Albin Kurti, se do të votonte për bashkimin e Kosovës dhe Shqipërisë në një referendum të mundshëm në të ardhmen, mund të shkaktojë trazira .
Sipas kryeministres serbe, stabiliteti dhe siguria në rajon po minohen.
“Ajo deklaratë është vetëm një gur tjetër në minimin e themeleve të stabilitetit rajonal dhe sigurisë rajonale. Ajo deklaratë mund të shkaktojë trazira të mëdha në të gjithë rajonin. Politika e Albin Kurtit është e qartë, ai duket se nuk e fsheh. Ajo që shqetëson më shumë është mungesa e reagimeve të komunitetit ndërkombëtar”, ka deklaruar ajo për Tanjugun.
Kryeministri Kurti ka deklaruar për revistën britanike “Monocle” se do të votonte pro në një referendum për bashkimin e Kosovës me Shqipërinë.
“Në të ardhmen nëse do të prezentohej si një referendum demokratik në mënyrë paqësore do të votoja pro, por e përsëris prapë, vetëm nëse do bëhej në mënyrë paqësore dhe demokratike”, ka thënë Kurti.