Besa Ismaili, sot, ka zhvilluar një vizitë në Komunën e Preshevës, dhe me këtë rast është pritur nga znj. Ardita Sinani, kryetare e komunës së Preshevës, takim të cilin znj. Ismaili e ka quajtur kuptimplotë, të frytshëm, bashkëpunues.

“Është frymëzim çdo herë kur takojmë gra në krye të detyrës, me integritet të plotë, që numërojnë sukseset në çdo përgjegjësi, zgjidhjet për çdo sfidë”, ka shkruar Besa Ismaili, duke ia përcjellë admirimin për punën e mirë që po bën dhe forcën ndryshuese që manifeston për të mirën e përgjithshme.

Pas takimit, kryetarja Ardita Sinani ka shkruar:

Kënaqësi ishte sot të prisja znj Besa Ismaili. Ish-deputete e Kuvendit të Republikës së Kosovës , ajo është një zë i shquar publik në çështjet e përfaqësimit publik të grave, lirive fetare dhe përkujdesje për grupet e margjinalizuara.
Përvojat e saj, të mirënjohura ndërkombëtarisht, për ndërtimin e paqes dhe promovimin e dialogut ndërkulturor e ndërfetar, janë gjithnjë të vlefshme.
Bashkë me Albionën, e falenderuam për mbështetjen dhe përkushtimin e saj për komunën tonë.