Zëvendëskryeministri i Kosovës, Besnik Tahiri, ka reaguar pas deklaratës së Shoqatës të Gastronomëve se nuk do t’u shërbejnë më në kafene, bare dhe restorante krerëve të qeverisë.

Pas masave anti-Covid, Shoqata e Gastronomëve të Kosovës ka shpallur qeverinë e Kosovës NON GRATA (të padëshirueshme) për kufizim të punës në këtë fushë.

Besnik Tahiri në llogarinë e vet në “Facebook” i ka ftuar gastronomët për kafe në zyrën e tij në qeveri, për t’u sqaruar lidhur me masat e reja.

“Meqë nuk e paskeni kuptuar saktë vendimin e Qeverisë që në një situatë tmerrësisht të rëndë u ka lënë hapësirë që të punoni, minimalisht 14 orë në ditë, edhe pse ka pasur ide që të mbyllej gjithçka, dhe meqenëse ju nuk po qitni kafe, atëherë ju thërras unë të gjithë juve nesër në ora 12:00 për kafe, në zyrën time, në Qeveri. Aty do të sqaroheni edhe më shumë! Mirë se vini!”, ka shkruar Tahiri.