![](https://www.epokaere.com/wp-content/uploads/2021/09/4000-600x360-1.jpg)
Bideni merr dozën përforcuese të vaksinës kundër Covid-19
Presidenti amerikan Joe Biden mori të hënën dozën përforcuese të vaksinës kundër COVID -19, me shpresën për të dhënë një shembull të fuqishëm për amerikanët mbi nevojën për të marrë dozën e tretë, edhe pse me miliona vetë nuk kanë bërë ende të parën.
Ndërsa vaksionohej, Presidenti Biden iu kundërpërgjigj kritikëve që thonë se Shtetet e Bashkuara duhet të japin më shumë vaksina për vendet e tjera të botës përpara se të nisin shpërndarjen e dozës përforcuese në vend.
“Ne do të bëjmë pjesën tonë”, tha presidenti amerikan.
Javën e kaluar Qendrat amerikane për Kontrollin dhe Parandalimin e Sëmundjeve (CDC) morën vendim të lejojnë kryerjen e një doze shtesë të vaksinës Pfizer/BioNTech për amerikanët mbi 65 vjeç, personat në moshë të rritur me probleme të sistemit imunitar si dhe ata që punojnë në ambjente me rrezik të lartë.
Presidenti 78 vjeçar, tha se edhe bashkëshortja e tij Jill Biden do ta merrte së shpejti dozën përforcuese të vaksinës.
Presidenti Biden njoftoi dozën e tretë në gusht si pjesë e një përpjekjeje për të rritur mbrojtjen kundër variantit tejet ngjitës të koronavirusit atij delta. Njoftimi erdhi në një kohë kur shkencëtarët janë të ndarë rreth nevojës për një dozë shtesë, në një kohë kur një numër i madh amerikanësh e shumë njerëz në vende të tjera të botës vazhdojnë të jenë të pavaksinuar.
Sipas zyrtarëve amerikanë dozën e tretë të Pfizerit mund ta marrin vetëm ata persona të cilët janë vaksinuar plotësisht të paktën gjashtë muaj më parë.
Agjencia amerikane e Ushqimit dhe Barnave (FDA) nuk e ka marrë ende në shqyrtim aplikimin e kompanisë Moderna për një dozë përforcuese ndërsa kompania Johnson & Johnson nuk ka aplikuar për një të tillë.
Zyrtarët amerikanë kanë përmendur atë që e kanë quajtur si “pandemi e të pavaksinuarve” për të mbështetur veprimet e tyre në çdo nivel, për zbatimin e urdhrave për vaksinim të detyruar dhe në disa raste kryerjen e e përsëritur të testeve.
Ekspertët vazhdojnë të nxisin nevojën për vaksinim në një kohë kur shpërthimet e infeksioneve në të gjithë Shtetet e Bashkuara vazhdojnë të vendosin në vështirësi sistemin e kujdesit shëndetësor, një situate që mund të përkeqësohen për shkak të mbilodhjes së stafit mjekësor apo refuzimit nga ana e këtyre të fundit, për t’u vaksinuar.