![](https://www.epokaere.com/wp-content/uploads/2021/08/Joe-Biden.jpg)
Bideni zotohet se do t’i mbrojë të drejtat e abortit
Presidenti i Shteteve të Bashkuara, Joe Biden, e ka dënuar një ligj të ri në shtetin e Teksasit, i cili e ndalon abortin qysh në të gjashtën javë.
Ligji “ekstrem” shkel haptazi të drejtat dhe “dëmton ndjeshëm” qasjen e grave në kujdesin shëndetësor, ka thënë Bideni.
Të mërkurën, Gjykata Supreme ka refuzuar bllokimin e ligjit të ri.
Ligji ndalon abortin pas zbulimit të rrahjeve të zemrës së fetusit – një pikë kjo kur shumë gra nuk e dinë që janë shtatzënë.
I ashtuquajturi Akt i Rrahjeve të Zemrës gjithashtu i jep çdo individi të drejtë t’i padisë mjekët që kryejnë abort pas javës së gjashtë.
Ai është nënshkruar nga guvernatori i Teksasit, Greg Abbott, në muajin maj.
Gjykata Supreme me shumicë konservatore nuk iu përgjigj një apeli urgjent nga grupet e të drejtave të grave dhe mjekët.
Në deklaratën e tij, presidenti Biden ka thënë se administrata e tij do t’i mbrojë të drejtat kushtetuese, të vendosura me aktin Roe v Wade.
Bideni i është referuar një rasti të vitit 1973, në të cilin Gjykata Supreme e ShBA-së kishte vendosur në favor të së drejtës së grave për të abortuar deri në mes të javës së 22-të dhe 24-të të shtatzënisë.