Bie numri i qytetarëve që hoqën dorën nga shtetësia e Kosovës

26 janar 2021 | 12:34

Mbi 3 mijë e 600 qytetarë të Kosovës kanë hequr dorë nga shtetësia gjatë vitit 2020, apo rreth 30 për qind më pak se në vitin 2019-të. Zyrtarë nga Divizioni për Shtetësi në Ministrinë e Punëve të Brendshme (MPB), kanë thënë se arsyeja kryesore për heqjen dorë nga shtetësia, është moslejimi i dy shtetësisë në shtete të ndryshme, kryesisht të Bashkimit Evropian, ku shumë qytetarë nga Kosova kanë migruar.

Ndryshe nga viti 2019, kur nga shtetësia e Republikës së Kosovës kanë hequr dorë mbi 5 mijë e 350 persona, numri i qytetarëve që janë liruar nga shtetësia gjatë vitit 2020, kur shtetet gjithandej globit janë izoluar si pasojë e pandemisë, ka shënuar rënie. Kjo rënie është për rreth 30 për qind, ka pohuar për “Radio Kosovën”, Liridon Neziri, udhëheqës i Divizionit për Shtetësi në Ministrinë e Punëve të Brendshme.

“Gjatë vitit 2020 kanë hequr dorë nga shtetësia e Republikës Kosovës mbi 3 mijë e 600 persona. Krahasuar me vitet paraprake ky numër është më i vogël pothuajse për rreth 30 për qind. Arsyet ndoshta mund të jenë edhe shkaqet pandemike që kanë ndodhur në tërë botën dhe kryesisht në ato vende ku janë të fokusuar shtetasit tanë me qëndrime rezidentë në vende të ndryshme”, ka thënë Neziri.

Neziri ka përmendur njërën nga arsyet kryesore që është duke i shtyrë qytetarët e Kosovës të kërkojnë të lirohen nga shtetësia.

“Disa shtete të Bashkimit Evropian nuk lejojnë dy shtetësinë për shtetasit të cilët nuk janë pjesë e BE-së. Ju e dini se ne kemi një numër jashtëzakonisht të madh të shtetasve tanë me qëndrim rezidentë në disa prej shteteve të Bashkimit Evropian, që tashmë janë integruar atje dhe pjesa më e madhe e tyre janë shtetas të Kosovës, apo edhe kanë lindur atje”, ka thënë ai.

Sipas të dhënave të Ministrisë së Punëve të Brendshme (MPB), gjatë viteve 2017 dhe 2018, nga shtetësia kanë heqë dorë mbi 11 mijë persona. Ndërkohë, ndërvite ka edhe kërkesa për fitimin e shtetësisë.

Sipas të dhënave të MPB-së, gjatë vitit 2020, numri i kërkesave për fitimin e shtetësisë ishte 338. Pas shqyrtimit të këtyre dhe kërkesave të tjera, 177 kërkesa ishin pranuar, ndërsa 244 të tjera ishin refuzuar.

Lajme të sponsorizuara

Të fundit
Kryeministri i Italisë, Giuseppe Conte, ka dhënë sot dorëheqje. Lënien…