Valbona Hysenaj Miftari

BIJAVE TË MIA

Bija ime,

Kur të vendosën në gjoksin tim për herë të parë qielli u hap.

Pashë edhe engjëjt sesi festonin lindjen tënde.

Sytë e babait tënd lëshonin lot lumturie.

Gushti përflakej aq natyrshëm dhe dielli ngrohte

edhe skutat më të thella të shpirtit.

Ulpiana, atë ditë kur ti linde

Veshët e mi përjetuan melodinë më të ëmbël,

të padëgjuar ndonjëherë.

* * *

E atë ditë të bukur maji

Kur ti Diana erdhe në këtë botë

Dielli u bë i tëri imi

dhe unë nuk ecja por fluturoja…

Dy bija, dy motra, dy zemra, katër duar,

katër sy, shumë dashuri…

Bijat e mia,

Mami ka një porosi:

Në çdo hap mbillni mirësi

Që jeta t’ju buzëqesh.

Mami e di,

Bota nuk do të jetë çdoherë e mirë,

por askush nuk do mund t’jua këpusë

sythat e degëve tuaja të shëndosha.

Mos braktisni rrugën e ëndrrave

edhe atëherë kur ëndrrat ju thyhen

para këmbëve tuaja.

Mblidhni copëzat e tyre dhe ngjitni përsëri,

Sepse stuhitë e jetës edhe pushojnë një ditë.

E di mami, e di

sado që shekulli i ri,

marrëzitë dhe grackat nuk janë zhdukur,

ndaj bëni kujdes

dinjiteti është virtyt i bukur!

Bijat e mia,

Trëndafilat e mi, vazhdoni të lulëzoni pa pra

se edhe unë rritem çdo ditë me ju.

Ju nuk keni më nevojë t’ju mbaj për dore,

po dashuria ime nuk ju braktis kurrë.

________________

(Dhjetor 2020)

ELEGJI

(Mbesës sime Servetit, e cila vdiq

në moshën 23 vjeçe,

tri javë pasi që u bë nënë)

Engjëjt kishin ndërruar rrugë

atë ditë të zezë.

qyqja mbi kulm kishte ngrehur folenë̈.

Tetë duar u ngritën lart,

një foshnjë e vogël qante për gji:

Nënë, s’të pashë kurrë me sy!

Varrin tashti ta bleron pranvera

me lule Shëngjergji përsëri,

kurorë për duvak

për të djegurën nusëri.

Të pret Alketa të kthehesh një ditë

me afshin e përkdheljeve prej nëne

t’ia gëzosh atë rritë.

Kur perdja e errësirës shfaq vegime

dhe kur dielli nis të dalë,

nanëzeza ofshan:

Bashkomë, o Zot, me bijën time!

___________________

(Shtator 1998)

NJË DITË

Prapë do t’i kërkosh

sytë e mi të mekur

por, më kot.

Ndoshta do të dëshirosh

të jemi prapë tok

si deri dje!

Stinët do të ndërrohen

dhe do të vijë një ditë me shi,

dhe ti do të vish përsëri.

Në do të më gjesh

Jo, nuk e di.

________________

(Shkurt 2005)