Inteligjenca artificiale është një nga përparimet më të rëndësishme teknologjike në historinë moderne, në të njëjtin nivel me krijimin e mikroprocesorëve, kompjuterëve personalë, internetit dhe telefonave celularë, shkruan Bill Gates në blogun e tij me titull: “Epoka e inteligjencës artificiale ka filluar”.

Themeluesi i Microsoft vendosi të shkruajë një postim të gjatë në blog në një kohë kur gara në inteligjencën artificiale (AI) po nxehet dhe kompanitë e teknologjisë po garojnë për të sjellë në treg chatbot-et e tyre.

Gates ka folur më parë se është i emocionuar për të ardhmen që do të sjellë inteligjenca artificiale, kryesisht për shkak të asaj se sa mund t’ua lehtësojë jetën njerëzve, të përmirësojë arsimin dhe mjekësinë.

Miliarderi tani tregon gjithashtu se ai ndan shqetësimet për AI, duke përfshirë rrezikun që njerëzit mund ta përdorin atë në një numër mënyrash negative, si dhe mundësinë e një AI super-inteligjente që mund të vendosë qëllimet e veta ndërsa teknologjia përparon.
Në blogun e tij me shtatë faqe, Gates shtjellon ide dhe mendime se si inteligjenca artificiale mund të përdoret për të rritur produktivitetin njerëzor, por edhe për të ndihmuar në korrigjimin e pabarazive në punë, shëndetësi dhe arsim.

Një punëtor i kualifikuar është në dispozicion për të ndihmuar me shumë detyra
Në vendin e punës, AI mund të përdoret si një “asistent personal dixhital” për të përmirësuar produktivitetin e punonjësve. Të integruara në mjetet dixhitale të punës, si Microsoft Office, mund të ndihmojnë në shkrimin dhe komunikimin me email.

Asistentët personalë të bazuar në AI të pajisur me njohuri të mëdha të kompanisë dhe industrisë mund të përfaqësojnë gjithashtu një burim të rëndësishëm për ndërveprimin e punonjësve.

Ndërsa fuqia kompjuterike rritet dhe bëhet më e lirë, aftësia e chatbot-eve për të komunikuar idetë e tyre do t’i ngjajë gjithnjë e më shumë një punonjësi të arsimuar që mund t’ju ndihmojë me një sërë detyrash”, shkruan Gates.

Një asistent dixhital që heq barrën nga profesionistët e kujdesit shëndetësorë

Në shëndetësi, Gates beson se inteligjenca artificiale mund të lirojë punonjësit nga disa punë, veçanërisht në fushën e burokracisë, por edhe të plotësojë formularët e mjekut për vizita.

Miliona njerëz në vendet e varfra nuk kanë as mundësinë të vizitohen nga një mjek dhe inteligjenca artificiale mund të rrisë produktivitetin e mjekëve për të parë sa më shumë pacientë. Është gjithashtu e mundur që AI mund të ndihmojë në trajtimin e pacientëve që nuk jetojnë afër ose nuk mund të shkojnë te një mjek.

Inteligjenca artificiale tashmë po përdoret për të analizuar të dhënat shëndetësore dhe madje edhe për të dizajnuar barna, dhe gjenerata e ardhshme do të jetë në gjendje të ndihmojë në parashikimin e efekteve negative dhe dozimin e barnave.

Për bujqësinë në vendet e varfra, Gates shkruan se inteligjenca artificiale mund të ndihmojë në prodhimin e farave të përshtatura posaçërisht për t’u rritur në klimat lokale, si dhe zhvillimin e vaksinave për bagëtinë. E gjithë kjo është thelbësore në një kohë kur kushtet klimatike po ndryshojnë dhe po u bëjnë edhe më shumë presion fermerëve në vendet e varfra.

Mësuesit do të duhet të përshtaten

Gates gjithashtu parashikon që AI do të transformojë arsimin në pesë deri në 10 vitet e ardhshme duke qenë në gjendje të përshtatë përmbajtjen arsimore për secilin student, si dhe të mësojë se çfarë e motivon ose e bën çdo individ të humbasë interesin.

Inteligjenca artificiale do të jetë gjithashtu në gjendje të ndihmojë në krijimin e planeve mësimore dhe të vlerësojë nivelin e të kuptuarit të temave të caktuara nga studentët.

Edhe pse teknologjia po përmirësohet, të mësuarit do të varet ende nga marrëdhënia nxënës-mësues. Ajo do të përmirësojë, por kurrë nuk do të zëvendësojë marrëdhënien student-mësues”, thekson Gates.

Ai gjithashtu shton se është shumë e rëndësishme që AI të jetë në dispozicion në zonat e varfra anembanë botës, në mënyrë që fëmijët të mos mbeten pas.