Behxhet Sh. SHALA – BAJGORA

Në vend se bisedimet midis dy shteteve që luftuan, njëra, Serbia për të ruajtur dhe mbajtur Kosovën si koloni dhe tjetra, Kosova për ta fituar lirinë si të gjitha vendet tjera, të jenë vullnet dhe domosdoshmëri e dy shteteve për normalizim të marrëdhënieve, bashkësia ndërkombëtare imponoi bisedimet krejtësisht të pabarabarta duke zbatuar në mënyrë të paskrupullt standarde të dyfishta. Serbia u favorizua në çdo pikëpamje duke u amnistuar nga krimet e bëra në hapësirat e ish-Jugosllavisë, deri në gjenocid. Pala kosovare krejtësisht e papërgatitur për bisedime, pa agjendë kombëtare dhe shtetërore u detyrua, sipas inercionit të kushtëzuar të pranojë çdo propozim të ndërkombëtarëve edhe në rast se e pësuan me humbje të territorit dhe duke e vënë seriozisht në pikëpyetje ekzistencën e vet shtetit. Ndërkombëtarët iu vardisen Serbisë duke i bërë lëshime të jashtëzakonshme që nga heqja e embargos për shitje të armëve e deri te proceset e integrimit në BE që u bënë me një dinamikë të përshpejtuar kurse Kosovës i imponuan legalizimin e ndërhyrjes së Serbisë në punët e rregullimit të brendshëm të Kosovës përmes Zonave të Mbrojtura dhe Asociacionit të Komunave të Serbisë në Kosovë, ekskluzivisht në baza etnike, duke i dhënë në këtë mënyrë më shumë fuqi në hartimin e infrastrukturës rrugore një popi të stërmbushur me mbushje shoviniste si puna e Sava Janjiqit që është më vendimmarrës se të gjithë ministrat e infrastrukturës së Kosovës. Kosovës ia imponuan Demarkacionin duke i premtuar liberalizim të vizave për t’i shtuar edhe një dry më shumë në kafazin e izolimit absolut ku janë vendosur, jo politikanët e papërgjegjshëm dhe shpërdorues kosovarë por qytetarët e Kosovës. Së fundi, Kosovës iu imponua edhe një Gjykatë Speciale për të gjykuar krimet që i ka “bërë” UÇK kurse, në mënyrën më të pështirë u amnistuan kriminelët e luftës së Serbisë Aleksandar Vuçiq, Vojisllav Sheshel, Daçiq, Dikoviq etj., e që në fakt paraqet racizëm të ndyrë. Tash, Kosovës po i imponohen bisedime biseksuale apo dybinarëshe, në njërën anë duan dhe duket se janë protagonistë kryesorë Borrell dhe Lajçak, me vend pune në Bruksel kurse me mendje dhe bindje në Beograd dhe, në anën tjetër i humburi në iluzionet e madhështisë së projektuar, arroganti tashmë i tredhur politikisht, Grenell dhe një president në përfundim të mandatit e që për fat të keq për ne do ta ketë edhe një mandat, Donald Tramp që Kosovën po e përdorë dhe keqpërdorë për qëllime elektorale duke imponuar një zgjidhje që do t’i kushtojë subjektivitetit shtetërorë të Kosovës dhe forcimit të rolit të Serbisë në Kosovë. Me gjasë duket se Parku me Trëndafila në Shtëpinë e Bardhë keq do të kundërmojë nga mbushja e brekëve të politikanëve tanë!
Ekipi negociator apo Ekipi shetitor i Kosovës:
Përfaqësuesit e Kosovës në këto bisedime janë krejtësisht të përçarë, pa ide, pa vizion, pa agjendë dhe me një qëndrim biseksual: brenda dhe para qytetarëve të Kosovës tregojnë muskuj dhe forcë kurse para ndërkombëtarëve i lëshojnë krejtësisht brekët duke ua lënë pjesët më të ndjeshme të trupit në dispozicion. Duke lejuar t’u nëpërkëmbët dhe shkërdhehet nderi! Ekipi Negociator me këtë Qeveri të lodhur fare bëri përpjekje të identifikohet krejtësisht në baza partiake, si Ekip i LDK-së që udhëhiqet nga Avdullah Hoti, me mungesë kronike të karizmës dhe koçeve për venime të mëdha politike dhe Skendës që u nxorrë nga naftalina e arkivit e që ende është i dehur nga fama e së kaluarës. Aktualisht Kosova po përfaqësohet nga Mohikani i Fundit në zinxhirin e marrjes së vendimeve të mëdha dhe Aristokrati i Fundit në organizimin fisnor politik të Kosovës. Kemi një opozitë të tredhur në ndërmarrjen e veprimeve opozitare kurse e fortë në sporte orale – retorikë. LV-ja kurrsesi nuk po pajtohet që ëndrra e mbajtjes së pushtetit nuk zgjati as sa një ëndërr e një nate vere, me fajin e saj, pa asnjë dyshim sepse deshi ta promovojë dhe instalojë tarakizmin politik dhe arrogancën ta përligj si standard të pakundërshtueshëm përmes mujsharëve që kanë para dhe analfabeteve roze. Tash po kërkojnë vetëm zgjedhje për të konfirmuar rezultatet e sondazheve në vend se të bashkrendisin veprimet opozitare. E kanë lansuar një ide se Grenelli që duket se është i urryeri nr.1 i LV-së duhet të refuzohet sikur dikur Gelbarti duke kërkuar një Holbruk të ri, kurrë mos u ktheftë duke injoruar faktin se nuk pati kundërshtim të organizuar ndaj Gelbartit por se pati sakrifikim individual dhe personal të vendosur të të Pavdekshmit Baca Adem Demaçit që nuk pranoi cilësimin e Gelbartit se UÇK qenka organizatë terroriste duke këmbëngulur, deri në vetëmohim se UÇK është ushtri çlirimtare. Në mungesë fizike të Bacës Adem, dhe në mungesë të respektit për veprën dhe sakrificën e Bacës, nga vrimat e rehatisë personale, kanë dalë minjtë e vegjël dhe të mëdhenj duke veshur lëkuren e luanit, me pretendime se nga ata varet, jo vetëm Kosova por edhe fati i botës. PDK shumë mirë e nisi itinerarin opozitar për t’u shndërruar së fundi në parti të Behgjet Pacollit, as mish e as peshk ku zëdhënësi mëton ta ketë rolin më të madh se vet kryetari i partisë. Nuk ka kuptim ta kritikoni pozitën, ta quani mashtruese e në anën tjetër ta përkrahni dhe votoni çdo propozim të pozitës! Në PDK janë dy rryma; ata që kanë mbetur jashtë sistemit dhe që po e presin rastin për kthim nga vdekja politike dhe e dyta që duket se vetëm deklarativisht duan të mbesin në opozitë. Të parët duan të bëhen pjesë e qeverisë, të dytët duan të mbesin në opozitë por në dashuri me pozitën e që nuk shkon. PDK-ja ose duhet të sillet si opozitë e vërtetë, ose duhet të fle në një krevat me Hotin.
Si përfundim; me këtë pozitë të lodhët dhe me këtë opozitë të përçarë, me një nënshtrim të pakusht ndaj Trampit dhe Grenellit, pa pasur një ofertë serioze, me këtë Ekip Negociator të përbërë nga eunukët politik, rezultati i bisedimeve nuk është aspak premtues. Andaj, në mungesë të një konsensusi politikë për çështje në interes të vendit thuaja e vetmja zgjidhje janë zgjedhjet. Në mos për asgjë tjetër, atëherë, së paku pengohet një zgjidhje e keqe për Kosovën.