Kryenegociatorët e Kosovës dhe të Serbisë, Besnik Bislimi dhe Petar Petkoviq, do të takohen të nesër (e martë) në Bruksel në kuadër të dialogut për normalizimin e marrëdhënieve.

Duke konfirmuar lajmin, zëdhënësi i BE-së për politikë të jashtme dhe siguri, Peter Stano, ka thënë se prioritet në takim do të jetë “nisja urgjente e zbatimit të Marrëveshjes për rrugën drejt normalizimit të marrëdhënieve“.

Për këtë marrëveshje, Kosova dhe Serbia kanë rënë dakord vitin e kaluar, por ajo nuk ka gjetur zbatim në terren.

Takimin mes kryenegociatorëve e kanë paralajmëruar javën e kaluar edhe kryeministri i Kosovës, Albin Kurti, dhe presidenti i Serbisë, Aleksandër Vuçiq, pas bisedimeve të ndara që kanë zhvilluar me përfaqësuesin e lartë të BE-së për politikë të jashtme dhe siguri, Josep Borrell.

Kurti dhe Vuçiqi nuk janë takuar bashkë, për shkak të, siç është thënë, kushteve që ka nxjerr kryeministri i Kosovës, e që nuk i pranoi presidenti i Serbisë.

Kurti e ka kushtëzuar vazhdimin e dialogut për normalizimin e marrëdhënieve me tri kërkesa: nënshkrimin e Marrëveshjes për rrugën e normalizimit të marrëdhënieve, tërheqjen e letrës me të cilën Serbia refuzoi zyrtarisht ta zbatonte marrëveshjen me Kosovën, dhe dorëzimin në Kosovë të Millan Radoiçiqit, i dyshuar për sulmin e armatosur në Banjskë.

Stano u ka thënë të hënën gazetarëve se qëllimi i dialogut mes Kosovës dhe Serbisë është “normalizimi i raporteve”.

“Kjo detyrë është dhënë nga BE-ja si mandat për lehtësuesit e dialogut. Pra, mandati është t’u ndihmohet dy palëve që t’i normalizojnë raportet. Njohja [e Kosovës nga Serbia] nuk është pjesë e mandatit. Natyrisht, konsekuencë logjike e normalizimit do të ishte njohja. Por, kjo është diçka shumë larg në rrugën e procesit”, ka thënë Stano.

Burimet diplomatike në Bruksel kanë thënë për “REL”-in se BE-ja po tenton që palët të bien dakord për një plan të sekuencuar të zbatimit të Marrëveshjes për normalizimin e marrëdhënieve.

Deri më tash, palët kanë pasur qëndrime të ndryshme për këtë.

Kosova nuk ka pranuar që prioritet kryesor të jetë themelimi i Asociacionit të komunave me shumicë serbe, ndërsa Serbia ka refuzuar t’i zbatojë obligimet që kanë të bëjnë me anëtarësimin e Kosovës në organizatat ndërkombëtare dhe me integritetin territorial të Kosovës.

Për takimin e nesërm  në mes të kryenegociatorëve, ka folur të hënën edhe kryetari i Kuvendit të Kosovës, Glauk Konjufca.

I pyetur nga gazetarët për qëllimin e këtyre bisedimeve, pas kushteve që i ka nxjerrë Kurti, ai ka thënë se “çdo instancë duhet ta mbajë atë qëndrim” sa u përket atyre kushteve.

Ato kushte janë të arsyeshme, sipas tij, dhe “duhet te sqarohen, në mënyrë që dialogu të ketë sukses”.

Konjufca ka thënë se nga BE-ja priten standardet më të larta, edhe të politikës, edhe të etikës në politikë.

Sipas tij, Borrell dhe i dërguari i tij për dialogun Kosovë-Serbi, Mirosllav Lajcak, “nuk kanë vepruar sipas standardeve më të larta evropiane”.

“Preferencat e tyre private dhe individuale kanë pasur ndikim të madh në mënyrën sesi e kanë formësuar dialogun”, ka thënë Konjufca.

Më herët, BE-ja i ka hedhur poshtë pretendimet e ngjashme të Kurtit se ndërmjetësuesit evropianë nuk janë neutralë. /REL