Zëvendëskryeministri Besnik Bislimi, ka pritur sot në takim delegacionet nga Finlanda dhe Irlanda.

Pas takimit, në një konferencë të përbashkët për media me ministrin e Finlandës për Çështje Evropiane dhe Drejtimin e Pronësisë, Tytti Tuppurainen dhe ministrin e Shtetit për Çështjet Evropiane të Irlandës, Thomas Byrne, Bislimi ka folur për anëtarësimin e Kosovës në NATO.

“Shpresojmë që anëtarësimi i shpejtë i Finlandës në NATO të përfundojë me sukses dhe të pasohet pastaj edhe me anëtarësimin e Kosovës”, ka thënë Bislimi.

Ai ka thënë se Kosova tashmë është dëshmuar si partnere serioze ndërkombëtare, sidomos pas agresionit të Rusisë në Ukrainë.

“Kosova veçse është dëshmuar si partner serioz në promovimin e vlerave të mirëfillta dhe bashkëpunimit ndërkombëtar”, ka thënë ai.

Duke folur për Finlandën dhe Irlandës, Bislimi ka thënë se e vlerësojnë lart “mbështetjen e dy vendeve mike për Kosovën” në disa procese integruese si dhe për liberalizimin e vizave.