Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka pritur në takim mëngjesin e sotëm përfaqësuesin e posaçëm të Sllovenisë për Ballkanin Perëndimor, Anzej Franges, të shoqëruar nga ambasadorja e Sllovenisë në Kosovë, Minca Benedejçiq.

Në njoftimin e qeverisë është thënë se fillimisht Franges e ka uruar Kosovën për mbarëvajtjen e zgjedhjeve të 9 shkurtit, ndërsa Bislimi ka shprehur se subjekti i tij është fituesi i zgjedhjeve dhe se presin certifikimin e rezultatit të zgjedhjeve dhe numërimit të të gjitha votave të qytetarëve.

Më tutje është bërë me dije se është diskutuar edhe për situatën në rajon dhe procesin e dialogut, për çfarë Bislimi ka shprehur nevojën për një qasje të balancuar ndaj palëve në mënyrë që të ecet përpara drejt normalizimit të plotë të marrëdhënieve.