Kriteret që duhet të plotësojnë bizneset e sektorit të mishit për eksport të produkteve, nevoja për përkrahje nga institucionet, kontrolli i kufirit për të ndaluar qarkullimin e produkteve në mënyrë jolegale dhe bashkëpunimi i inspektoratit komunal me atë qendror ishin disa nga temat kryesore të diskutimit në takimin virtual të realizuar ndërmjet Odës së Afarizmit të Kosovës, Drejtor i Shëndetit Publik në Agjencinë e Ushqimit dhe Veterinarisë së Kosovës (AUVK) Flamur Kadriu dhe bizneset e sektorit të mishit.

Kryetari i Bordit të Odës së Afarizmit të Kosovës, Skënder Krasniqi, ka përgëzuar AUVK-un për arritjen e eksportit të mishit të ardhur nga Evropa me prejardhje nga shpezët. “Ky mish të mundësohet të ketë prejardhje edhe nga Kosova, e jo të jetë obligim prejardhja nga vendet e Bashkimit Evropian apo vendet e lejuara nga BE”, ka thënë Krasniqi.

Kadriu ka falënderuar OAK-un dhe bizneset për takimin, duke shtuar që momentalisht është arritur të eksportohet vetëm mishi i shpezëve, prejardhja e të cilave është nga BE-ja apo vendet e pranuara nga BE.

Për të arritur këtë, AUVK ka kaluar një proces për tri vite, ndërsa një nga vështirësitë e hasura ishte mos qartësia e statusit të shëndetit të kafshëve në Kosovë.

Tutje sipas Kadriu, Kosova fillimisht duhet të kontrollojë kufijtë ashtu që të mos lejohet futja joformale e shtazëve e gjithashtu duhet të anëtarësohet edhe në Organizatën për Shëndetin e Kafshëve sepse momentalisht nuk kemi të drejtë të raportojmë sëmundjet e kafshëve.

Kadriu ka pohuar se mungesa e bashkëpunimit të Inspektorëve të Veterinarisë në nivel komunal me ata qendror, po e vështirëson edhe më shumë kontrollin në terren.

Adil Spahiu nga “Industria e Mishit Malësia” ka theksuar që shteti duhet të mbrojë bizneset prodhuese duke iu lehtësuar qasjen në tregjet rajonale dhe ndërkombëtare, duke shtuar tutje që bizneset e këtij sektori janë të gatshme të përkrahin AUVK-un në çdo mënyrë ashtu që të tejkalohet situata aktuale.

Gëzim Selimi nga “Industria e Mishit Calabria” ka kërkuar të informohet në detaje për eksportin e produkteve të mishit të shpezëve, prejardhja e të cilave është nga vendet e BE-së.

Bizneset prezentë në këtë takim virtual patën mundësitë të informohen për nga afër lidhur me mundësitë e zhvillimit të veprimtarive të tyre, ku në fund të takimit u dakorduan që të zhvillohet edhe një sesion informues me biznesin e parë që ka arritur të eksportojë.

(A.M / Epoka e re)