130 vjet më parë ka vdekur shkrimtari shqiptar Kostandin Kristoforidhi (1827-1895). Në këtë përvjetor jubilar, figurën dhe kontributin e tij arsimor, shkencor dhe letrar e ka përkujtuar Biblioteka Kombëtare e Kosovës, e cila në rrjete sociale ka publikuar disa prej librave të tij të vjetër dhe të rrallë të cilët i ka në Divizionin e Koleksioneve të Veçanta.

“Në 130-vjetorin e vdekjes, përkujtojmë shkrimtarin shqiptar Kostandin Kristoforidhi (1827-1895). Kristoforidhi ka qenë përkthyes, studiues i gjuhës shqipe dhe një ndër autorët më me ndikim në periudhën e Rilindjes Kombëtare. Vepra kryesore e tij, për të cilën punoi më shumë se njëzet vjet, është “Fjalori i gjuhës shqipe” me 11 675 leksema, i përpiluar në toskërisht me alfabet të mbështetur në shkronja greke dhe i botuar më 1904 në Athinë. Në të janë përjashtuar shumica e huazimeve, veçanërisht orientalizmat dhe greqizmat.

Kristoforidhi ka shkruar tregimin e parë prozaik origjinal në gjuhën shqipe, njëkohësisht tregimin e parë për fëmijë “Gjaja e Malësorvet” (Hieja e Tomorrit) në të dy kryedialektet.

Një prej kontributeve të tjera të tij është në fushën e përkthimeve. Ai ka përkthyer vepra të njohura nga letërsia botërore në gjuhën shqipe, duke ndihmuar në pasurimin e gjuhës shqipe përmes letërsisë së huaj. Përkthimet e tij ishin një mjet i rëndësishëm për lidhjen e kulturës shqiptare me kulturat e tjera.

Një tjetër kontribut i rëndësishëm i Kristoforidhit ishte angazhimi i tij për ruajtjen e traditës dhe kulturës shqiptare. Ishte mbështetës i Rilindjes Kombëtare dhe ka marrë pjesë në aktivitetet kulturore dhe politike të kohës. Me veprat që shkroi dhe botoi u bë një nga figurat kyçe të përpjekjeve për shpëtimin e identitetit dhe gjuhës kombëtare, duke u munduar ta ruante dhe zhvillonte pasurinë e trashëgimisë kulturore shqiptare.

Kristoforidhi ishte, gjithashtu, një njeri i shquar në veprimtarinë edukative. Ai kontribuoi për ngritjen e shkollave dhe mbështeti përpjekjet për përhapjen e arsimit në gjuhën shqipe. Ai e kuptoi rëndësinë e arsimit për zhvillimin e kombit dhe përmirësimin e kushteve të jetesës, prandaj angazhimi i tij në fushën e arsimit ishte pjesë e rëndësishme e veprimtarisë së tij.

Me vepra dhe kontribut Kristoforidhi ka lënë gjurmë të thella në historinë e kulturës dhe të letërsisë shqiptare, prandaj vazhdon të vlerësohet dhe nderohet.

Biblioteka Kombëtare e Kosovës në Divizionin e Koleksioneve të Veçanta, i ruan me përkushtim të madh disa prej veprave të tij të botuara për herë të parë”, ka shkruar BKK në rrjete sociale.