Përfaqësuesi i lartë i diplomacisë evropiane, Josep Borrell, ka uruar Shqipërinë përmes një publikimi në median sociale X, njohur më parë si Twitter, lidhur me zgjedhjen e vendit në Këshillin e OKB-së për të Drejtat e Njeriut.

Njëkohësisht, Borrell ka uruar edhe Bullgarinë, Francën dhe Holandën, të cilat po ashtu kanë siguruar nga një mandat trevjeçar në organin e lartë të Organizatës së Kombeve të Bashkuara.

“Të gjithë 15 anëtarët e sapozgjedhur të duhet të respektojnë standardet më të larta për të promovuar dhe mbrojtur të drejtat e njeriut në nivel global. Mezi presim të punojmë me të gjithë”, nënvizon kryediplomati evropian në postimin e tij.

Më parë, një urim ka ardhur nga ana e SHBA-ve për Shqipërinë, lidhur me zgjedhjen e kësaj të fundit në Këshillin e OKB-së për të Drejtat e Njeriut, për mandatin trevjeçar 2024-2026.

“Shqipëria ka qenë një zë parimor në Këshillin e Sigurimit të OKB-së dhe zgjedhja e saj në Këshillin e të Drejtave të Njeriut është një mundësi tjetër për të dalë në mbrojtje të më të cenuarve në mbarë botën”, shkruhet në njoftimin e Ambasadës Amerikane në Tiranë. “Ne jemi krenarë që qëndrojmë përkrah Shqipërisë në promovimin e dinjitetit njerëzor dhe drejtësisë në mbarë botën”.

Shqipëria u zgjodh në organin e lartë të OKB-së me 123 vota pro.

Ajo u përzgjodh gjatë votimeve në dy nga tre vendet vakante për rajonin e Evropës Lindore, ku kandidatë të tjerë ishin Bullgaria dhe Rusia.

Lajmin e ka bërë me dije kryediplomati shqiptar, Igli Hasani, përmes një publikimi në median sociale X, njohur më parë si Twitter.

“Shqipëria u zgjodh sot në Këshillin e të Drejtave të Njeriut, për periudhën 2024-26. Një tjetër arritje e madhe e politikës dhe diplomacisë së jashtme shqiptare; një tjetër demonstrim besimi nga OKB dhe shtetet anëtare për rolin e Shqipërisë në çështjet ndërkombëtare”, shkruan ai.

Po ashtu, ministri për Evropën dhe Punët e Jashtme, shton se këtë herë, vendi është plotësisht i përkushtuar për mbrojtjen dhe promovimin e të drejtave të njeriut kudo dhe për të gjithë.

Shqipëria ndodhej në kategorinë e përfaqësimit të Evropës Lindore dhe ndante shanse të barabarta me Bullgarinë dhe Rusinë për dy pozita në Këshill.

Megjithatë, vendet anëtare kanë parë si të përshtatshme zgjedhjen e Shqipërisë dhe Bullgarisë në këtë organ të lartë të OKB-së, duke lënë Rusinë jashtë, pas përjashtimit që iu bë vitin e shkuar, pas fillimit të agresionit në Ukrainë.

Në tërësi ndërkaq, u zgjodhën 15 anëtarë të rinj në Këshill, nga e gjithë bota, për periudhën 2024-2026.

Ato janë Shqipëria, Brazili, Bullgaria, Burundi, Kina, Bregu i Fildishtë, Kuba, Republika Dominikane, Franca, Gana, Indonezia, Japonia, Kuvajti, Malawi dhe Holanda.

Duhet thënë edhe se Shqipëria ka fituar respektin maksimal për qëndrimet dhe përfaqësimin tejet dinjitoz në Këshillin e Sigurimit, sa për ta zhbërë tërësisht një ndikim të tillë që Greqia mund të ketë në vendet anëtare të Kombeve të Bashkuara.

Përpos kësaj, vetë Qeveria e Tiranës gëzon besim të plotë nga i gjithë komuniteti evropian – aq sa i ka besuar edhe rolin e një lideri rajonal për çështjet e integrimit, me fillimisht organizimin e Samitit BE-Ballkani Perëndimor në Tiranë, e më tej edhe me organizimin që pritet të jetë ai i Procesit të Berlinit.

Në ndërkohë, ministeriale euro-ballkanike me rëndësi janë zhvilluar gjatë këtyre javëve në Tiranë, si shenjë përgatitje për Samitin e Procesit të Berlinit.

Si të mos mjaftonte kjo, mandati shqiptar në Këshillin e Sigurimit po mbyllet me një notë të lartë, përmes një nisme të madhe që diplomacia shqiptare ndërmori për krizat humanitare, ku kërkon partneritetin me sektorin privat, duke shtuar ndihmat.