Bashkimi Evropian (BE) nuk ka plane që ta njohë Qeverinë e re të Afganistanit, kurdo që ajo të formohet, por do të angazhohet me administratën e udhëhequr nga talibanët në baza “operacionale”.

Kështu ka thënë shefi i diplomacisë së BE-së, Josep Borrell në një konferencë për media.

“Në mënyrë që të mbështesim popullin afgan, ne do të angazhohemi me Qeverinë e re në Afganistan, por kjo nuk do të thotë njohje. Është një angazhim operacional”, ka thënë Borrelli.

Ai ka theksuar se 27 vendet e bllokut evropian do të koordinojnë kontaktet e tyre me talibanët përmes një prezence të përbashkët të BE-së në Kabul për të mbikëqyrur evakuimet dhe për t’u siguruar që qeveria e re në Kabul do të përmbushë zotimet mbi çështjet e sigurisë dhe të drejtave të njeriut.

Borrelli ka theksuar se talibanët duhet të formojnë një qeveri përfshirëse dhe përfaqësuese, të lejojë qasje të ndihmës humanitare dhe të lejojë shtetasit e huaj dhe afganët në rrezik që të largohen nga vendi.

“Ne kemi vendosur që të punojmë në mënyrë të koordinuar, të koordinojmë kontaktet tona me talibanët, përfshirë edhe përmes një prezence të përbashkët të Bashkimit Evropian në Kabul… nëse kushtet e sigurisë plotësohen”, ka thënë Borrelli gjatë një takimi me ministrat e Jashtëm të bllokut në Slloveni.

“BE-ja gjithashtu do të kërkojë që të koordinojë angazhimin me partnerët në rajon për çështje të emigrantëve dhe krimit të organizuar”, ka thënë Borrelli.