Britania e Madhe paralajmëron Rusinë për pasoja nëse pushton Ukrainën
Sekretarja e Jashtme e Britanisë së Madhe, Liz Truss, ka paralajmëruar Rusinë se do të përballet me “pasoja të rënda ekonomike” nëse pushton Ukrainën.
Ajo tha se takimi i ministrave të jashtëm të G7 që pritet të mbahet në Liverpool këtë fundjavë do të ishte një shfaqje e unitetit dhe do të bënte të qartë se një veprim i tillë do të ishte “gabim strategjik”.
Tutje, Truss deklaroi se Mbretëria e Bashkuar dhe aleatët e saj duhej të “frenonin Rusinë nga ndërmarrja e këtij veprimi”. Tensionet po rriten ndërsa Moska ka grumbulluar trupa në kufirin e Ukrainës, por Kremlini ka mohuar se planifikon ta pushtojë.
Duke përsëritur paralajmërimet e mëparshme nga SHBA-ja dhe aleatët e saj, Truss tha se G7 “do të jetë absolutisht e fortë në qëndrimin kundër agresionit… në lidhje me Ukrainën”.
Ukraina ndan kufij me BE-në dhe Rusinë, por si një ish-republikë sovjetike ajo ka lidhje të thella sociale dhe kulturore me Rusinë. Megjithatë, Rusia ka akuzuar Ukrainën për provokim dhe ka kërkuar garanci kundër zgjerimit të NATO-s drejt lindjes dhe vendosjes së armëve pranë kufirit të saj, shkruan BBC, transmeton Klankosova.tv.
Përpara takimit të G7, Truss zhvilloi bisedime me ministrin e jashtëm ukrainas, Dmytro Kuleba, në Londër. E pyetur nëse mund të përjashtonte një përgjigje ushtarake ndaj agresionit rus, Truss tha se Mbretëria e Bashkuar po punon me Ukrainën për “aftësitë e mbrojtjes dhe sigurisë”.
“Ne po u ofrojmë mbështetje. Ne po punojmë gjithashtu për t’i ndihmuar ata për elasticitetin energjetik. Pra, ata nuk varen vetëm nga furnizimet ruse të energjisë. Dhe kjo është mënyra se si do të ndihmojmë në fund të fundit në Ukrainë.” tha ajo.
Truss deklaroi se Mbretëria e Bashkuar dhe BE po përpiqeshin të siguronin që ekonomitë perëndimore të vareshin më pak nga energjia ruse.
Presidenti i SHBA-së, Joe Biden, dhe presidenti rus, Vladimir Putin, mbajtën të martën një samit virtual që synon uljen e tensioneve në rajon. Biden tha se ia kishte bërë të qartë Putinit se do të kishte “pasoja ekonomike si ato që ai nuk kishte parë ndonjëherë” nëse ai pushtonte Ukrainën.
