Qeveria e Britanisë së Madhe ka thënë të dielën se synon të largojë masat e fundit kufizues më vonë këtë muaj derisa vala e infeksionit me “Omicron” po bie.

Muajin e kaluar, Anglia ka kaluar te “plani B” në lidhje me masat kufizuese duke vënë në fuqi sërish udhëzimet për punë nga shtëpia dhe kërkesat për pasaportë vaksinimi për të marrë pjesë në evente më të mëdha.

Qeveria do të largojë këto masa më 26 janar, por obligimi për vendosjen e maskës mund të vazhdojë sipas raportimeve.

Ministri Oliver Dowden, bashkëkryetar i partisë konservatore të kryeministrit Boris Johnson, ka thënë se “shenjat ishin inkurajuese”.

“Ka qenë gjithmonë shpresa ime që do të kishim kufizimet e Planit B për periudhën më të shkurtër të mundshme. Unë nuk kam asnjë dyshim llojin e ngarkesave që kjo i vendos mikpritjes, biznesit më të gjerë, shkollave dhe kështu me radhë dhe unë dua që ne t’i heqim qafe ato nëse mundemi”, ka thënë ai për “Sky News”.

Pasi është shfaqur varianti “Omicron”, numri i rasteve ditore me Covid-19 në Britani ka arritur një rekord prej 200 mijë infeksionesh në fillim të janarit, por tani ka rënë në më pak se gjysmën e tij.

Relaksimi i ardhshëm është thënë se do të jetë pjesë e planeve të Johnsonit për të rifituar postin e tij të kryeministrit ndërsa ai lufton me një mori akuzash për festat pavarësisht masave kufizuese, ose aferën “partygate” në Downing Street.

Udhëheqësi i Partisë Laburiste të opozitës, Keir Starmer, ka rënë dakord me nevojën për të hequr kufizimet “sa më shpejt të jetë e mundur” nëse shkencëtarët e qeverisë bien dakord, por vuri në dukje sfondin e skandalit politik.

“Unë dua që ato të hiqen sepse shkenca mjekësore thotë se ato duhet të hiqen, jo thjesht sepse kryeministri është në një rrëmujë të vërtetë dhe ai po përpiqet dëshpërimisht të dalë prej saj”, ka thënë ai për “BBC”.

Shumë deputetë konservatorë janë të shqetësuar për raportet e thyerjes së rregullave në Downing Street dhe tashmë e kishin paralajmëruar Johnson se nuk mund të llogarisë në mbështetjen e tyre për të zgjatur kufizimet kundër Covid-19.

Duke u përballur me mbështetësit e shqetësuar të konservatorëve, kryeministri kundërshtoi thirrjet e disa shkencëtarëve për të vendosur një bllokim të plotë në dhjetor dhe lejoi që ngjarjet sportive të vazhdojnë me turma në Angli.

Qeveria e Skocisë dhe Uellsit kanë vendosur ndalime për turmat e mëdha në ndeshjet sportive muajin e kaluar, por tani e kanë hequr atë rregull në kohë për turneun e rugbit të gjashtë kombeve që fillon muajin e ardhshëm.